આ અઠવાડિયે સોના અને ચાંદીના ભાવમાં વધારો જોવા મળ્યો છે. ‘ઇન્ડિયા બુલિયન એન્ડ જ્વેલર્સ એસોસિએશન’ (IBJA) અનુસાર, એક કિલોગ્રામ ચાંદીના ભાવમાં ₹7,988નો વધારો થયો છે અને તે ₹2.37 લાખ પર પહોંચી છે. અગાઉ 11 સપ્ટેમ્બરના રોજ તેનો ભાવ ₹2.29 લાખ હતો. 10 ગ્રામ 24-કેરેટ સોનાનો ભાવ ₹1.52 લાખથી વધીને ₹1.54 લાખ થયો છે,જે આ અઠવાડિયે ₹1,789નો વધારો દર્શાવે છે.
વિવિધ શહેરોમાં સોનાના ભાવમાં તફાવત હોવાના 4 કારણો
પરિવહન અને સુરક્ષા:એક શહેરથી બીજા શહેરમાં સોનું લઈ જવામાં ઈંધણ અને સુરક્ષાનો ખર્ચ થાય છે; અંતર વધવાની સાથે ભાવમાં પણ વધારો થાય છે.
ખરીદીનું પ્રમાણ: દક્ષિણ ભારતમાં વધુ વપરાશ (આશરે 40%) હોવાને કારણે ઝવેરીઓ જથ્થાબંધ ખરીદી કરે છે, જોકે ડિસ્કાઉન્ટનો લાભ મર્યાદિત રહે છે.
સ્થાનિક જ્વેલરી એસોસિએશનો: રાજ્ય અને શહેર સ્તરના જ્વેલરી એસોસિએશનો સ્થાનિક માંગ અને પુરવઠાના આધારે ભાવ નક્કી કરે છે.
જૂનો સ્ટોક અને ખરીદ કિંમત: ઝવેરીઓ જે ભાવે સોનું ખરીદે છે તેના આધારે ગ્રાહકો માટે વેચાણ કિંમત નક્કી થાય છે.
ડિસેમ્બર સુધીમાં સોનું ₹1.70 લાખ અને ચાંદી ₹3 લાખ સુધી પહોંચી શકે
એક એક્સપર્ટના જણાવ્યા અનુસાર, સામાન્ય જનતાની સાથે સાથે વિશ્વભરની સેન્ટ્રલ બેંકો (RBI સહિત) પણ સતત સોનું ખરીદી રહી છે. વર્તમાન અનિશ્ચિતતા વચ્ચે સોનાના ભાવમાં વધારાનો ટ્રેન્ડ ચાલુ રહેવાની ધારણા છે, જ્યારે પરિસ્થિતિ સુધરતાં ચાંદીના ભાવમાં મોટો ઉછાળો આવવાની શક્યતા છે. વર્તમાન વલણોને જોતાં, ડિસેમ્બર સુધીમાં સોનું ₹1.70 લાખ અને ચાંદી ₹3 લાખ સુધી પહોંચી શકે છે.
આ વર્ષે સોનું ₹21,000 મોંઘું થયું
આ વર્ષે સોના અને ચાંદીના ભાવમાં સતત વધઘટ જોવા મળી છે. અત્યાર સુધીમાં સોનાના ભાવમાં ₹21,000નો વધારો થયો છે. 31 ડિસેમ્બર, 2025ના રોજ 10 ગ્રામ સોનાનો ભાવ ₹1.33 લાખ હતો. જે હવે વધીને ₹1.54 લાખ પર પહોંચ્યો છે. દરમિયાન, 31 ડિસેમ્બર 2025ના રોજ ચાંદીનો ભાવ ₹2.30 લાખ પ્રતિ કિલોગ્રામ હતો, જે હવે વધીને ₹2.37 લાખ થયો છે. આ સમયગાળા દરમિયાન, 29 જાન્યુઆરીએ સોનું ₹1.76 લાખની સર્વકાલીન ઊંચી સપાટીએ પહોંચ્યું હતું, જ્યારે ચાંદી ₹3.86 લાખની સર્વકાલીન ઊંચી સપાટીએ પહોંચી હતી.
દેશના મોટા શહેરોમાં શું છે સોના ચાંદીના ભાવ( ગુડ રિટર્ન્સ અનુસાર ) (26 સપ્ટેમ્બર)
| શહેર | 24 કેરેટનો ભાવ | 22 કેરેટનો ભાવ |
| દિલ્હી | 1,52,830 | 1,40,100 |
| મુંબઈ | 1,52,680 | 1,39,950 |
| કોલકાતા | 1,52,680 | 1,39,950 |
| ચેન્નઈ | 1,52,730 | 1,40,100 |
| અમદાવાદ | 1,52,730 | 1,40,000 |
ઝવેરીઓ પાસેથી સોનું ખરીદતી વખતે આ 2 બાબતો ધ્યાનમાં રાખો
માત્ર પ્રમાણિત સોનું જ ખરીદો: હંમેશા ‘બ્યુરો ઓફ ઈન્ડિયન સ્ટાન્ડર્ડ્સ’ (BIS) હોલમાર્ક ધરાવતું પ્રમાણિત સોનું જ ખરીદો. આ હોલમાર્ક નંબર આલ્ફાન્યૂમેરિક (અક્ષર અને અંકનું મિશ્રણ) હોય છે—ઉદાહરણ તરીકે, AZ4524. હોલમાર્કિંગ સોનાની શુદ્ધતા (કેરેટેજ) દર્શાવે છે.
ભાવની ચકાસણી કરો: ખરીદીના દિવસે સોનાનું ચોક્કસ વજન અને તેનો ભાવ વિવિધ સ્ત્રોતો (જેમ કે ‘ઈન્ડિયા બુલિયન એન્ડ જ્વેલર્સ એસોસિએશન’ની વેબસાઇટ) દ્વારા ચકાસી લો. સોનાના ભાવ તેની શુદ્ધતા 24-કેરેટ, 22-કેરેટ અને 18-કેરેટના આધારે અલગ-અલગ હોય છે.
અસલી ચાંદી ઓળખવાની 4 રીતો:
- ચુંબક પરીક્ષણ: અસલી ચાંદી ચુંબક સાથે ચોંટતી નથી. જો તે ચોંટી જાય, તો તે નકલી છે.
- બરફ પરીક્ષણ: ચાંદી પર બરફ મૂકો. અસલી ચાંદી પર બરફ ઝડપથી ઓગળી જાય છે.
- ગંધ પરીક્ષણ: અસલી ચાંદી ગંધહીન હોય છે. નકલી ચાંદીમાંથી ઘણીવાર તાંબા જેવી ગંધ આવે છે.
- કાપડ પરીક્ષણ: સફેદ કાપડ વડે ચાંદીને ઘસો. જો કાળો ડાઘ પડે, તો તે અસલી છે.