આજના ડિજિટલ યુગમાં સોશિયલ મીડિયા પર પોતાની ખાનગી જિંદગી, લક્ઝરી લાઈફસ્ટાઈલ અને કિંમતી વસ્તુઓનું પ્રદર્શન (Show-Off) કરવાનો ક્રેઝ ખૂબ જ વધી ગયો છે. લોકો નવી કાર, મોંઘા કપડાં, દાગીના અને રોકડ રકમ દર્શાવતા વીડિયો બનાવીને લાઈક્સ અને વ્યુઝ મેળવવાનો પ્રયાસ કરતા હોય છે. પરંતુ આ જ ચમકધમક ક્યારેક મોટી મુસીબતનું કારણ બની શકે છે. તમિલનાડુના કન્યાકુમારી જિલ્લામાંથી એક એવો જ ચોંકાવનારો કિસ્સો સામે આવ્યો છે, જ્યાં સોશિયલ મીડિયા પર પોતાની રોયલ લાઈફસ્ટાઈલ દર્શાવવી એક જાણીતા યુટ્યુબર કપલને ભારે પડી ગઈ છે.

ઘરનો પાછળનો દરવાજો તોડી તસ્કરોએ મચાવ્યો આતંક

મળતી વિગતો અનુસાર, આ ચોંકાવનારી ઘટના કન્યાકુમારી જિલ્લાના નાગરકોઈલ નજીક આવેલા થમ્માથુકોનમના પોશ વીઆઈપી ગાર્ડન વિસ્તારની છે. અહીં જાણીતી મહિલા યુટ્યુબર મધુમિતા તેના પતિ વિનોદ કુમાર સાથે રહે છે. બંને સોશિયલ મીડિયા પર ખૂબ જ સક્રિય છે અને પોતાના દૈનિક જીવનના વીડિયો તેમજ વ્લોગ્સ સતત અપલોડ કરતા રહે છે.

ચોરોએ તેમના ઘરને નિશાન બનાવ્યું

રાત્રિના સમયે અજ્ઞાત ચોરોએ તેમના ઘરને નિશાન બનાવ્યું હતું. તસ્કરો ઘરના પાછળના ભાગેથી અંદર ઘૂસ્યા હતા અને પાછળનો દરવાજો તોડીને ઘરમાં પ્રવેશ કર્યો હતો. ઘરમાં ઘૂસ્યા બાદ ચોરોએ કબાટ અને અન્ય જગ્યાઓએ રાખેલા કિંમતી સામાનની તપાસ કરી હતી. ચોરો ઘરમાંથી આશરે 118 સોવરેન (સાઉથ ઈન્ડિયામાં સોનાના વજન માટે વપરાતો એકમ, જ્યાં 1 સોવરેન એટલે 8 ગ્રામ થાય) એટલે કે આશરે 944 ગ્રામ (લગભગ 1 કિલો) સોનાના મોંઘા દાગીના અને મોટી રકમની રોકડ રકમ ચોરીને સફાચટ કરી ગયા હતા.

સીસીટીવી ફૂટેજ ચકાસીને પોલીસે શરૂ કરી તપાસ

ચોરીની ઘટનાની જાણ થતાં જ વિસ્તારમાં ઉત્તેજના વ્યાપી ગઈ હતી. ઘટના અંગે તરત જ સ્થાનિક રાજક્કમંગલમ પોલીસ સ્ટેશનને જાણ કરવામાં આવી હતી. પોલીસની ટીમ ઘટનાસ્થળે દોડી આવી હતી અને સમગ્ર ઘરનું નિરીક્ષણ કર્યું હતું. ફિંગરપ્રિન્ટ એક્સપર્ટ્સ અને ફોરેન્સિક ટીમે પણ સ્થળ પરથી જરૂરી પુરાવા એકઠા કર્યા હતા. પોલીસે ગુનો નોંધીને ઘરની આસપાસ તેમજ સોસાયટીમાં લાગેલા સીસીટીવી કેમેરાના ફૂટેજ ખંગાળવાનું શરૂ કર્યું છે. ચોરો કઈ દિશામાંથી આવ્યા હતા, તેમની પાસે કોઈ વાહન હતું કે કેમ અને ચોરી કર્યા પછી તેઓ ક્યાં ભાગી ગયા તેની ઊંડાણપૂર્વક તપાસ હાથ ધરવામાં આવી રહી છે.

પોલીસ તપાસમાં આવ્યો ચોંકાવનારો ‘સોશિયલ મીડિયા એંગલ’

આ હાઈપ્રોફાઈલ ચોરીની તપાસ દરમિયાન પોલીસ સામે એક અત્યંત ચોંકાવનારો એંગલ સામે આવ્યો છે. પોલીસને આશંકા છે કે આ ચોરી પાછળ સોશિયલ મીડિયા પર કરવામાં આવેલું પ્રદર્શન મુખ્ય કારણ હોઈ શકે છે.

 જે વીડિયો પોસ્ટ કરતા હતા, તેમાં તેમની લક્ઝરી લાઈફસ્ટાઈલ બતાવતા

મધુમિતા અને તેના પતિ વિનોદ કુમાર યુટ્યુબ પર જે વીડિયો પોસ્ટ કરતા હતા, તેમાં તેમની લક્ઝરી લાઈફસ્ટાઈલ સ્પષ્ટપણે દેખાતી હતી. તેમના ઘણા વીડિયોમાં સોનાના ભારે દાગીના, મોંઘી વસ્તુઓ અને કેશ રકમ પણ વિડીયોની ફ્રેમમાં દેખાતી હતી. સોશિયલ મીડિયા પર અપલોડ થતા આવા વીડિયો માત્ર મિત્રો કે પરિવારજનો જ નહીં, પરંતુ હજારો અજાણ્યા લોકો પણ જોતા હોય છે.

શું વીડિયો જોઈને ઘરની રેકી કરવામાં આવી હતી?

પોલીસ હાલમાં એ જ દિશામાં તપાસ કરી રહી છે કે શું ચોરોએ આ કપલના સોશિયલ મીડિયા એકાઉન્ટ્સ પર નજર રાખીને તેમના ઘરની રેકી કરી હતી? શું ચોરોને વીડિયો પરથી જ ખબર પડી હતી કે ઘરમાં આટલી મોટી માત્રામાં સોનું અને રોકડ રકમ રાખેલી છે?

ઘરનો પાછળનો દરવાજો તોડીને ચોરી કરી

શાતિર ચોરોએ જે રીતે ઘરનો પાછળનો દરવાજો તોડીને ચોરી અંજામ આપી છે, તેના પરથી લાગે છે કે તેમને ઘરના નકશા અને સુરક્ષા અંગે પહેલાથી જ તમામ માહિતી મળી ગઈ હતી. આ ઘટનાએ ફરી એકવાર સાબિત કરી દીધું છે કે ડિજિટલ પ્લેટફોર્મ પર પોતાની અંગત જિંદગી અને કિંમતી વસ્તુઓની વધુ પડતી વિગતો શેર કરવી કેટલી જોખમી સાબિત થઈ શકે છે.  

આ પણ વાંચો :   Sandesh Digital Explainer : સ્કૂલ બેગ નહીં તો કોણ? બાળકોની પીઠના દુખાવાનું રહસ્ય તમને ચોંકાવશે!