ભરૂચ શહેરને સ્વચ્છ રાખવા નગરપાલિકાએ ખુલ્લામાં કચરો ફેંકનારાઓ સામે કાર્યવાહી શરૂ કરી છે. ડોર ટુ ડોર કચરા કલેક્શનની સુવિધા હોવા છતાં, ઘણા લોકો જાહેર સ્થળોએ કચરો ફેંકી રહ્યા હતા. આથી નગરપાલિકાએ રાત્રે ખાસ ડ્રાઇવ ચલાવી. મુખ્ય અધિકારી હરીશ અગ્રવાલના કહેવા પર સેનેટરી ઇન્સ્પેક્ટરોની ટીમોએ રાત્રે વોચ રાખી. ખુલ્લામાં કચરો ફેંકવા આવેલા કેટલાક લોકોના વીડિયો ઉતારી તેમની સામે દંડની કાર્યવાહી કરાઈ. ટીમોએ લોકોને જાહેર સ્થળોએ કચરો ન ફેંકવા અને ડોર ટુ ડોર કચરા કલેક્શનનો ઉપયોગ કરવા સમજાવ્યા. દુકાનો બહાર કચરો ફેંકતા વેપારીઓ પાસે સ્થળ પર જ સફાઈ કરાવાઈ. આ કાર્યવાહીથી જાહેર સ્થળોએ કચરો ફેંકનારાઓમાં ડર ફેલાયો છે. ચીફ ઓફિસર હરીશ અગ્રવાલે કહ્યું કે, સ્વચ્છતા જાળવવા આવી રાત્રિ ડ્રાઇવ આગળ પણ ચાલુ રહેશે. ગંદકી ફેલાવનારાઓ સામે નિયમ પ્રમાણે પગલાં લેવાશે.