વિરાટ કોહલીએ ફરી એકવાર સાબિત કરી દીધું છે કે મોટી મેચ અને મોટા મંચ પર તેમનું બેટ કેમ બોલે છે. વેસ્ટ ઈન્ડિઝ સામેની પ્રથમ વનડેમાં કોહલીએ શાનદાર સદી ફટકારીને પોતાની આંતરરાષ્ટ્રીય સદીઓની સંખ્યા 86 પર પહોંચાડી છે.કોહલીએ માત્ર 74 બોલમાં સદી પૂરી કરી હતી. આ તેમની વનડે કારકિર્દીની 55મી સદી છે. આ સદી સાથે તેઓ સચિન તેંડુલકરના 100 આંતરરાષ્ટ્રીય સદીના ઐતિહાસિક રેકોર્ડની વધુ નજીક પહોંચી ગયા છે. કોહલી હવે સચિનથી 14 આંતરરાષ્ટ્રીય સદી પાછળ છે.
વેસ્ટ ઈન્ડિઝ સામે 10મી વનડે સદી
કોહલીએ વેસ્ટ ઈન્ડિઝ સામે સદી ફટકારીને વધુ એક મોટો રેકોર્ડ પોતાના નામે કર્યો છે. હવે કેરેબિયન ટીમ સામે તેમના નામે 10 વનડે સદી થઈ ગઈ છે.એક જ ટીમ સામે સૌથી વધુ વનડે સદીના મામલે કોહલી હવે શ્રીલંકા અને વેસ્ટ ઈન્ડિઝ બંને સામે 10-10 સદી ફટકારી ચૂક્યા છે.
ગિલ સાથે 151 રનની ભાગીદારી
વેસ્ટ ઈન્ડિઝ સામેની આ મેચમાં કોહલીએ શરૂઆતમાં સિંગલ અને ડબલ લઈને ઇનિંગને સંભાળી હતી. ત્યારબાદ તક મળતાં તેમણે બાઉન્ડ્રી ફટકારવાનું શરૂ કર્યું હતું.કોહલીને ભારતીય કેપ્ટન શુભમન ગિલનો શાનદાર સાથ મળ્યો હતો. બંને વચ્ચે ત્રીજી વિકેટ માટે 151 રનની ભાગીદારી થઈ હતી. ગિલે પણ શાનદાર બેટિંગ કરતાં 108 બોલમાં 110 રનની ઇનિંગ રમી હતી.ગિલના આઉટ થયા બાદ કોહલીએ ભારતીય ઇનિંગની જવાબદારી સંભાળી હતી. તેમણે પોતાની સદી પૂરી કરીને ભારતને લક્ષ્યની વધુ નજીક પહોંચાડ્યું હતું.
સિક્સ સાથે ફિફ્ટી અને સદી
કોહલીએ છગ્ગા સાથે પોતાની અડધી સદી પૂરી કરી હતી અને ત્યારબાદ શાનદાર બેટિંગ ચાલુ રાખીને સદી પણ પૂરી કરી હતી. તેમની આ ઇનિંગ દરમિયાન તેમણે ભારતીય ધરતી પર વનડે ક્રિકેટમાં સૌથી વધુ રન બનાવવાનો રેકોર્ડ પણ પોતાના નામે કર્યો હોવાનું આંકડાઓમાં દર્શાવવામાં આવ્યું છે.ભારતમાં સૌથી વધુ વનડે રન બનાવનારા બેટરોની યાદીમાં કોહલીના નામે 6,983 રન થયા છે. તેમણે સચિન તેંડુલકરના 6,976 રનને પાછળ છોડી દીધા છે. આ યાદીમાં રિકી પોન્ટિંગ 5,521 રન સાથે ત્રીજા સ્થાને છે.
11 ઇનિંગમાં 9 વખત 50 પ્લસ
વિરાટ કોહલી હાલમાં વનડે ક્રિકેટમાં શાનદાર લયમાં જોવા મળી રહ્યા છે. તેમની છેલ્લી 11 વનડે ઇનિંગ્સમાં 9 વખત 50 કે તેથી વધુ રન નોંધાયા છે.આ આંકડો તેમની સતત સારા પ્રદર્શનની તસવીર રજૂ કરે છે. વેસ્ટ ઈન્ડિઝ સામેની પ્રથમ વનડેમાં પણ કોહલીએ લાંબી ઇનિંગ રમીને ટીમને મજબૂત સ્થિતિમાં પહોંચાડી હતી.37 વર્ષની ઉંમરે પણ કોહલીનું બેટિંગ પ્રદર્શન સતત ચર્ચામાં છે. વેસ્ટ ઈન્ડિઝ સામેની આ સદી સાથે તેમણે એક જ મેચમાં અનેક વ્યક્તિગત સિદ્ધિઓ પોતાના નામે કરી છે અને આંતરરાષ્ટ્રીય ક્રિકેટમાં 100 સદીના સચિન તેંડુલકરના ઐતિહાસિક આંકડા તરફ પોતાની સફર વધુ આગળ વધારી છે.
આ પણ વાંચો – Crickete News : 70 વર્ષની ઉંમરે T20I ડેબ્યૂ, પૌત્રી સાથે ઓપનિંગ કરવા ઉતર્યા આ દાદી