સુરત શહેરમાં કચ્છ કડવા પાટીદાર સમાજ દ્વારા એક અત્યંત મહત્વપૂર્ણ અને દીર્ઘદ્રષ્ટિવાળો નિર્ણય લેવામાં આવ્યો છે. સમાજની મળેલી જનરલ સભામાં એક મોટો પ્રસ્તાવ પસાર કરવામાં આવ્યો છે, જેના અંતર્ગત હવે સુરતમાં ત્રીજા સંતાનને જન્મ આપનાર દંપતીને સમાજ તરફથી આર્થિક સહાય પૂરી પાડવામાં આવશે. આ જાહેરાતથી સમગ્ર પાટીદાર સમાજમાં ભારે ચર્ચા જાગી છે.

કુલ 1 લાખ રૂપિયાની ફિક્સ ડિપોઝિટ સહાય

મળતી માહિતી મુજબ, દક્ષિણ ગુજરાત કચ્છ કડવા પાટીદાર સમાજ દ્વારા થોડા દિવસો અગાઉ જ ત્રીજા બાળકના જન્મ પર 50,000 રૂપિયાની ફિક્સ ડિપોઝિટ આપવાની જાહેરાત કરવામાં આવી હતી. હવે સુરત કચ્છ કડવા પાટીદાર સમાજ દ્વારા પણ અલગથી 50,000 રૂપિયાની ફિક્સ ડિપોઝિટની જાહેરાત કરવામાં આવી છે. આમ, સુરતમાં જન્મનાર ત્રીજા સંતાનને દક્ષિણ ઝોન તરફથી 50,000 અને સુરત સમાજ તરફથી 50,000 મળીને કુલ 1 લાખ રૂપિયાની આર્થિક સહાય મળશે.

સમાજમાં ઘટતી વસ્તી અટકાવવાનો મુખ્ય હેતુ

આ નિર્ણય પાછળનો મુખ્ય ઉદ્દેશ્ય સમાજમાં સતત ઘટી રહેલી વસ્તી અને વસ્તીમાં સર્જાતા અસંતુલનને દૂર કરવાનો છે. આજકાલ યુવા દંપતીઓમાં માત્ર એક જ બાળક રાખવાની વધતી જતી માનસિકતા અને તેના કારણે ભવિષ્યમાં ઊભી થનારી અસમાનતા અને અસંતુલિત પરિસ્થિતિને ટાળવા માટે સમાજના વડીલોએ આ સરાહનીય પહેલ હાથ ધરી છે.

જનરલ સભામાં સર્વાનુમતે લેવાયો નિર્ણય

સુરત ખાતે યોજાયેલી કચ્છ કડવા પાટીદાર સમાજની જનરલ સભામાં ઉપસ્થિત તમામ હોદ્દેદારો અને સભ્યોની ઉપસ્થિતિમાં આ મહત્વનો નિર્ણય લેવાયો હતો. સમાજના આ પ્રોત્સાહક પગલાથી યુવા દંપતીઓમાં પરિવાર નિયોજન અને વસ્તી વધારા અંગે સકારાત્મક સંદેશ જશે તેવી અપેક્ષા વ્યક્ત કરવામાં આવી રહી છે.

આ પણ વાંચો: Surat News: ત્રીજા બાળકની સહાય પર મળશે 50,000ની ફિક્સ ડિપોઝિટ સહાય, આ સમાજે લીધો નિર્ણય