દમણ ખાતે ગત 13 સપ્ટેમ્બર 2026ના રોજ આચરવામાં આવેલા ચકચારી હત્યા કેસમાં સુરત ક્રાઈમ બ્રાન્ચને મોટી સફળતા મળી છે. સુરત ક્રાઈમ બ્રાન્ચની ટીમે બાતમીના આધારે વોન્ટેડ આરોપી શૈલેશ રાકેશ સોની અને સન્નીકુમાર રામસજીવન નિશાદને ઝડપી પાડ્યા છે. હત્યાના આ ગંભીર ગુનામાં સંકળાયેલા બંને આરોપીઓ ઘટનાને અંજામ આપ્યા બાદથી નાસતા ફરતા હતા, જેમને હવે કાનૂની શિકંજામાં લેવામાં આવ્યા છે.

બોલાચાલી બાદ લોખંડના સળિયા વડે જીવલેણ હુમલો

આરોપીઓ ગત 13 સપ્ટેમ્બરના રોજ દમણ ખાતે ફરવા માટે ગયા હતા. આ દરમિયાન કોઈ નજીવી બાબતે એક યુવક સાથે તેમની ઉગ્ર બોલાચાલી થઈ હતી. આ બોલાચાલીએ જોતજોતામાં હિંસક સ્વરૂપ ધારણ કર્યું હતું અને બંને આરોપીઓએ આવેશમાં આવીને યુવક પર લોખંડના સળિયા વડે જીવલેણ હુમલો કરી દીધો હતો. હુમલામાં ગંભીર રીતે ઈજાગ્રસ્ત થયેલા યુવકનું મોત નીપજ્યું હતું, ત્યારબાદ આરોપીઓ સ્થળ પરથી ફરાર થઈ ગયા હતા.

દમણના કચીગામ પોલીસ સ્ટેશનમાં નોંધાયો હતો ગુનો

આ હત્યા અંગે દમણના કચીગામ પોલીસ સ્ટેશનમાં બંને આરોપીઓ વિરુદ્ધ હત્યાનો ગુનો નોંધવામાં આવ્યો હતો અને પોલીસ તેમની સઘન શોધખોળ કરી રહી હતી. દરમિયાન સુરત ક્રાઈમ બ્રાન્ચે ટેકનિકલ સર્વેલન્સ અને બાતમીના આધારે બંને આરોપીઓની અટકાયત કરી છે. આગળની કાયદેસરની કાર્યવાહી હાથ ધરીને સુરત પોલીસે પકડાયેલા બંને આરોપીઓનો કબજો દમણની કચીગામ પોલીસને સોંપવાની તજવીજ હાથ ધરી છે.

ગુજરાતના વધુ સમાચાર વાંચવા માટે ક્લિક કરો