ગીર સોમનાથ જિલ્લાના સુત્રાપાડા તાલુકાના ખાંભા ગામે એક વાડીમાંથી પુખ્ત અજગર મળ્યો હતો. વન વિભાગની ટીમે તાત્કાલિક રેસ્ક્યૂ કામગીરી કરી તેને સુરક્ષિત રીતે પકડી લીધો હતો. ખાંભા ગામમાં દેવા રામ વઢિયાની વાડીમાંથી આ અજગર મળી આવ્યો હતો. અજગરને જોઈને વાડીમાં હાજર લોકોમાં ચિંતા ફેલાઈ હતી. વન વિભાગને જાણ કરાતા સુત્રાપાડા રાઉન્ડના પ્રાંચી બીટ હેઠળનો સ્ટાફ ઘટનાસ્થળે પહોંચ્યો હતો. તેમણે સાવચેતીપૂર્વક અજગરનું રેસ્ક્યૂ કર્યું હતું. જે બાદ અજગરને મહોબતપરા અનામત જંગલ વિસ્તારમાં સુરક્ષિત રીતે છોડી દેવાયો હતો. વન વિભાગે વન્યજીવને કોઈ નુકસાન ન થાય તેની કાળજી રાખી હતી. માનવ વસાહતમાં વન્યજીવ દેખાય ત્યારે તેને નુકસાન પહોંચાડવાને બદલે વન વિભાગને જાણ કરવી જરૂરી છે.