અમદાવાદ શહેરના પૂર્વ વિસ્તારમાં આવેલી શાળાઓમાં વિદ્યાર્થીઓમાં શિસ્ત અને સંસ્કારનો અભાવ ચિંતાનો વિષય બની રહ્યો છે. બાપુનગર વિસ્તારમાં આવેલી જાણીતી જીવન સાધના સ્કૂલમાં ધોરણ 11માં અભ્યાસ કરતા વિદ્યાર્થીઓ વચ્ચે અંદરોઅંદર હિંસક મારામારી થઈ હોવાની શરમજનક ઘટના સામે આવી છે. સામાન્ય બાબતમાં શરૂ થયેલી બોલાચાલીએ ઉગ્ર સ્વરૂપ ધારણ કરી લેતાં શાળા પરિસર બહાર ભારે અફરાતફરીનો માહોલ સર્જાયો હતો.

ગાળો બોલવાના વિવાદમાં વિદ્યાર્થીનીઓ પર હુમલો

મળેલી વિગતો અનુસાર, જીવન સાધના સ્કૂલના ધોરણ 11ના વર્ગમાં અભ્યાસ કરતા વિદ્યાર્થીઓ વચ્ચે ગાળાગાળી અને અશોભનીય ભાષાનો ઉપયોગ કરવા બાબતે માથાકૂટ થઈ હતી. આ વિવાદ એટલો વધી ગયો કે શાળા છૂટ્યા બાદ ઉશ્કેરાયેલા એક વિદ્યાર્થીએ રસ્તા પર જ વિદ્યાર્થીનીઓ પર હુમલો કરી દીધો હતો. જાહેરમાં વિદ્યાર્થીનીઓ સાથે મારામારી થતાં જ આસપાસના લોકો અને વાલીઓ એકઠા થઈ ગયા હતા.

સ્થાનિકોએ હસ્તક્ષેપ કરી વિદ્યાર્થીને પકડી શાળાને સોંપ્યો

શાળા બહાર જાહેરમાં ચાલતો આ હંગામો જોઈને આસપાસના સ્થાનિક રહીશો તાત્કાલિક સ્થળ પર દોડી આવ્યા હતા. સ્થાનિકોએ વચ્ચે પડીને મામલો થાળે પાડ્યો હતો અને હુમલો કરનાર વિદ્યાર્થીને સ્થળ પર જ પકડી પાડ્યો હતો. ત્યારબાદ સ્થાનિકો દ્વારા તે વિદ્યાર્થીને શાળા સંચાલકો અને શિક્ષકો સમક્ષ હાજર કરવામાં આવ્યો હતો. શાળા છૂટ્યા બાદ વિદ્યાર્થીઓ વચ્ચે થયેલી આ મારામારીની ઘટનાને પગલે શાળા મંડળ અને વાલીઓમાં ભારે ચિંતા વ્યાપી ગઈ છે, તેમજ શાળા તંત્ર દ્વારા આ મામલે કડક પગલાં લેવાની કવાયત હાથ ધરાઈ છે.

આ પણ વાંચો : Ahmedabad News : વિયેતનામથી ટ્રાવેલ બેગમાં લવાતો હતો કરોડોનો ગાંજો, IGI એરપોર્ટ પર આંતરરાષ્ટ્રીય તસ્કરીનો પર્દાફાશ