ગાંધી જયંતીના પવિત્ર અવસરે કેદીઓમાં સકારાત્મક પરિવર્તન લાવવા અને તેમના શારીરિક-માનસિક સ્વાસ્થ્યને સુધારવાના ઉદ્દેશ્યથી ગુજરાત રાજ્ય યોગ બોર્ડ દ્વારા વાવ-થરાદ સબ જેલ ખાતે વિશેષ યોગ અને પ્રાણાયામ શિબિરનું આયોજન કરવામાં આવ્યું હતું. આ કાર્યક્રમમાં કેદીઓએ ઉત્સાહભેર ભાગ લીધો હતો.

જિલ્લા પોલીસ વડાનું વિશેષ માર્ગદર્શન અને આહ્વાન

આ કાર્યક્રમમાં વાવ-થરાદ જિલ્લા પોલીસ વડા ચિંતન તેરૈયા વિશેષ ઉપસ્થિત રહ્યા હતા. તેમણે કેદીઓને સંબોધિત કરતા મહાત્મા ગાંધીજીના સત્ય, અહિંસા અને ઉમદા સિદ્ધાંતોના માર્ગ પર ચાલવા માટે પ્રેરિત કર્યા હતા. પોલીસ વડાએ કેદીઓને ભવિષ્યમાં કોઈપણ પ્રકારના ગેરકાયદે કે ખરાબ કાર્યોથી દૂર રહીને સારા કાર્યો દ્વારા એક ઉજ્જવળ ભવિષ્યનું નિર્માણ કરવા માટે હૂંફ અને માર્ગદર્શન પૂરું પાડ્યું હતું.

કેદીઓ દ્વારા યોગમય જીવન જીવવાનો સંકલ્પ

શિબિર દરમિયાન ઉપસ્થિત કેદીઓએ યોગ અને પ્રાણાયામ કરીને પોતાના જીવનને સ્વસ્થ અને નિરોગી રાખવાનો સંકલ્પ લીધો હતો. નોંધનીય છે કે ગુજરાત રાજ્ય યોગ બોર્ડ દ્વારા થરાદ સબ જેલમાં કેદીઓ માટે દરરોજ નિયમિત ધોરણે યોગ-પ્રાણાયામની પ્રવૃત્તિઓ કરાવવામાં આવે છે, જેનાથી તેમના માનસિક તણાવમાં ઘટાડો થઈ રહ્યો છે.

મહાનુભાવોની ઉપસ્થિતિ

આ ધાર્મિક અને આરોગ્યપ્રદ કાર્યક્રમને સફળ બનાવવા માટે યોગ કો-ઓર્ડિનેટર દશરથ સોની, ડો. રિતેશ પ્રજાપતિ, જગદીશ પ્રજાપતિ તથા જેલર રમેશભાઈ ચૌધરી સહિતનો પોલીસ અને યોગ બોર્ડનો સ્ટાફ મોટી સંખ્યામાં ઉપસ્થિત રહ્યો હતો.

આ પણ વાંચો: Vav-Tharad : બેવટામાં SOGનો દરોડો, ઘરમાંથી 1.497 કિલો અફીણ ઝડપાયું