ગીર સોમનાથ જિલ્લાના વેરાવળ ખાતે રેલવે સરકારી ક્વાર્ટરમાં ધમધમતા જુગારના અખાડા પર રાજકોટ પશ્ચિમ રેલવે LCB (લોકલ ક્રાઈમ બ્રાન્ચ) ની ટીમે બાતમીના આધારે સપાટો બોલાવ્યો છે. રેલવે કોલોનીની અંદર ચાલતા આ ગેરકાયદે તીનપત્તીના જુગારધામનો પર્દાફાશ થતાં સ્થાનિક રેલવે વર્તુળોમાં ભારે ચકચાર મચી ગઈ છે.

RPFના બે હેડ કોન્સ્ટેબલ સહિત 6 શખ્સો ઝડપાયા

પ્રાપ્ત વિગતો મુજબ, રેલવે કોલોનીના ક્વાર્ટર નં. 28(E) માં આ જુગાર રમાડવામાં આવી રહ્યો હતો. તપાસ દરમિયાન ચોંકાવનારી બાબત એ સામે આવી છે કે, પકડાયેલા આરોપીઓમાં રેલવે સુરક્ષા દળ (RPF) ના બે હેડ કોન્સ્ટેબલ પણ સામેલ છે. પાડોશીના રેલવે ક્વાર્ટરમાં આ જુગારધામ ચલાવાતું હોવાનું પોલીસ ફરિયાદમાં બહાર આવ્યું છે.

2.51 લાખ રૂપિયાથી વધુનો મુદ્દામાલ જપ્ત

પોલીસે દરોડા દરમિયાન જુગાર રમતા તમામ 6 શખ્સોને રંગેહાથ ઝડપી લીધા હતા. સ્થળ પરથી પોલીસે:

• રોકડ રકમ: 57,700 રૂપિયા
• મોબાઈલ ફોન: 6 નંગ

અન્ય મુદ્દામાલ સહિત કુલ રૂ. 2.51 લાખથી વધુની કિંમતનો મુદ્દામાલ જપ્ત કર્યો છે.

તમામ આરોપીઓ સામે કાયદેસરની કાર્યવાહી

પકડાયેલા તમામ છ આરોપીઓ સામે જુગારધારા (Gambling Act) હેઠળ ગુનો નોંધીને કાયદેસરની ધરપકડ કરવામાં આવી છે. સરકારી રેલવે ક્વાર્ટરમાં સુરક્ષા કર્મચારીઓની જ સંડોવણી બહાર આવતા હવે રેલવે તંત્ર દ્વારા આ કર્મચારીઓ સામે કેવા પ્રકારની આંતરિક કે ખાતાકીય પગલાં લેવામાં આવે છે તેના પર સૌની નજર રહેશે.

આ પણ વાંચો: Gir Somnathમાં વનકર્મીઓનું સરકાર સામે બ્યુગલ, ગ્રેડ-પે અને સિક્યોરિટી એલાઉન્સ મુદ્દે રાજ્યવ્યાપી આંદોલન શરૂ!