અમદાવાદના મણિનગર વિસ્તારમાં આવેલી પ્રગતિ સ્કૂલમાંથી શિક્ષક અને વિદ્યાર્થીની વચ્ચેના સંબંધોને લજવતી એક અત્યંત શરમજનક ઘટના સામે આવી છે. શાળાના એક લંપટ શિક્ષકે સોશિયલ મીડિયા પર ફેક (નકલી) એકાઉન્ટ બનાવીને પોતાની જ સ્કૂલની વિદ્યાર્થીનીને અશ્લીલ અને આપત્તિજનક મેસેજ મોકલવાનું શરૂ કર્યું હતું. વાલીઓને આ અંગે શંકા જતાં તેમણે સતર્કતા દાખવીને સમગ્ર યોજના બનાવી શિક્ષકની આ કાળી કરતૂતને રંગેહાથ ઝડપી પાડી હતી, જેથી આખી ઘટનાનો પર્દાફાશ થયો હતો.
DEO દ્વારા સ્કૂલ સંચાલકોને આકરી નોટિસ
ઘટનાની ગંભીરતાને ધ્યાને લઈને અમદાવાદ જિલ્લા શિક્ષણ અધિકારી (DEO) દ્વારા તાત્કાલિક ધોરણે આકરા પગલાં ભરવામાં આવ્યા છે. DEO એ પ્રગતિ સ્કૂલના ટ્રસ્ટીઓ અને સંચાલકોને કારણદર્શક નોટિસ ફટકારી છે. આ લંપટ શિક્ષક વિરુદ્ધ શાળા તંત્ર દ્વારા અત્યાર સુધીમાં શું કાનૂની અને વહીવટી પગલાં લેવામાં આવ્યા છે તેની તમામ વિગતો તથા ખુલાસા સાથે માત્ર 1 દિવસની અંદર ડીઈઓ કચેરી ખાતે રૂબરૂ હાજર રહેવા માટે આકરો હુકમ કરવામાં આવ્યો છે.
વાલીઓનો ભારે વિરોધ, આકડા દંડનીય પગલાંની શક્યતા
શિક્ષકની આ હલકી માનસિકતા અને શાળા સત્તામંડળની લાપરવાહી સામે વિદ્યાર્થીઓના વાલીઓમાં ભારે રોષ અને આક્રોશનો માહોલ જોવા મળી રહ્યો છે. શાળા જેવા પવિત્ર ધામમાં વિદ્યાર્થીનીઓની સુરક્ષા સામે સવાલો ઊભા થતાં શિક્ષણ વિભાગ પણ હરકતમાં આવ્યું છે. જો શાળા સંચાલકો યોગ્ય અને સંતોષકારક ઉત્તર નહીં આપી શકે તો DEO દ્વારા સ્કૂલ વિરુદ્ધ કડક દંડનીય તેમજ વહીવટી કાર્યવાહી કરવામાં આવે તેવી પૂરેપૂરી શક્યતા છે.