અમદાવાદ શહેરના ઐતિહાસિક એલિસ બ્રિજ પર મોડી રાત્રે એક યુવકે બ્રિજ પરથી કૂદીને આત્મહત્યા કરવાનો પ્રયાસ કરતાં ભારે હંગામો મચી ગયો હતો. યુવકના આ કદમથી બ્રિજ પરથી પસાર થતાં વાહનચાલકો અને રાહદારીઓમાં અફરાતફરીનો માહોલ સર્જાયો હતો. ઘટનાની જાણ થતાં જ મોટી સંખ્યામાં લોકો અને વાહનચાલકો બ્રિજ પર એકઠા થઈ ગયા હતા.

ફાયર બ્રિગેડની ટીમે ભારે જહેમત બાદ યુવકને બચાવ્યો

ઘટનાની ગંભીરતાને ધ્યાને લઈ સ્થાનિકો દ્વારા તાત્કાલિક અમદાવાદ ફાયર બ્રિગેડને જાણ કરવામાં આવી હતી. ઘટનાસ્થળે પહોંચેલી ફાયર જવાનોની ટીમે ભારે સમયસૂચકતા અને ધીરજ દાખવી હતી. ફાયર અધિકારીઓએ યુવક સાથે સમજી-વિચારીને વાતચીત કરી તેને સમજાવવાનો પ્રયાસ કર્યો હતો અને યોગ્ય તક મળતાં જ ભારે જહેમત બાદ યુવકને સુરક્ષિત રીતે નીચે ઉતારી તેનો જીવ બચાવી લીધો હતો.

બ્રિજ પર ટ્રાફિક જામની સ્થિતિ, પોલીસે હાથ ધરી તપાસ

યુવકના આ હાઈવોલ્ટેજ ડ્રામા અને ફાયર બ્રિગેડના રેસ્ક્યુ ઓપરેશન દરમિયાન એલિસ બ્રિજ પર લાંબો ટ્રાફિક જામ સર્જાયો હતો. પોલીસ કાફલાએ સ્થળ પર પહોંચી વાહનવ્યવહાર પૂર્વવત કરાવ્યો હતો. ફાયર ટીમે યુવકને સુરક્ષિત રીતે નીચે ઉતાર્યા બાદ સ્થાનિક પોલીસને સુપ્રત કર્યો હતો. યુવકે આ આત્યંતિક પગલું ભરવાનો પ્રયાસ કેમ કર્યો તે અંગે પોલીસે આગળની વિગતવાર તપાસ હાથ ધરી છે.

આ પણ વાંચો : Narmada News : સરદાર સરોવર ડેમ 99 ટકા ભરાયો, સપાટી 138.64 મીટરે પહોંચતાં ગુજરાત બે વર્ષ માટે પાણી બાબતે નિશ્ચિંત