બનાસકાંઠા જિલ્લાના અંબાજી ખાતે વિશ્વ અવકાશ સપ્તાહ નિમિત્તે એક પ્રેરણાદાયી અને અનોખી પહેલ જોવા મળી છે. મજદૂર કલ્યાણ ટ્રસ્ટ સંચાલિત અંબાજીની આદિવાસી આશ્રમશાળામાં વિદ્યાર્થીઓ માટે ખાસ કાર્યક્રમનું આયોજન કરવામાં આવ્યું હતું. આ કાર્યક્રમનો મુખ્ય હેતુ આદિવાસી બાળકોમાં સ્પેસ એજ્યુકેશન પ્રત્યે રૂચિ વધારવાનો અને તેમનામાં વૈજ્ઞાનિક અભિગમ કેળવવાનો હતો, જેથી તેઓ વિજ્ઞાનને માત્ર પુસ્તકો પૂરતું સીમિત રાખવાને બદલે પ્રયોગાત્મક રીતે સમજી શકે.
વિદ્યાર્થીઓએ જાતે બનાવ્યા અને ઉડાડ્યા વોટર રોકેટ
કાર્યક્રમ દરમિયાન આયોજિત વોટર રોકેટ વર્કશોપ થકી બાળકોને રોકેટ ટેકનોલોજીની પ્રાયોગિક સમજ આપવામાં આવી હતી. ઉત્સાહી વિદ્યાર્થીઓએ પોતાની જાતે પાણીથી ઉડતા વોટર રોકેટ તૈયાર કર્યા હતા અને ત્યારબાદ તેને સફળતાપૂર્વક આકાશમાં ઉડાડીને અદ્ભુત કૌશલ્યનું પ્રદર્શન કર્યું હતું. આ પ્રયોગ બાળકો માટે એકદમ રોમાંચક અને યાદગાર અનુભવ બની રહ્યો હતો, જેણે તેમને અવકાશ વિજ્ઞાનમાં ભવિષ્ય ઘડવા માટે પ્રેરિત કર્યા હતા.
4 થી 10 ઓક્ટોબર દરમિયાન વિવિધ સ્પર્ધાઓનું આયોજન
બાળકોમાં અવકાશ વિજ્ઞાન પ્રત્યે જાગૃતિ લાવવા માટે 4 થી 10 ઓક્ટોબર સુધી અંબાજી અને આસપાસની વિવિધ શાળાઓમાં અનેકવિધ સ્પર્ધાઓનું આયોજન કરવામાં આવ્યું છે. જેમાં નિબંધ લેખન, ક્વિઝ, ચિત્રકામ અને વકૃત્વ સ્પર્ધાનો સમાવેશ થાય છે. આ પ્રકારના અભિગમથી ગ્રામીણ અને આદિવાસી વિસ્તારના વિદ્યાર્થીઓને પણ વિજ્ઞાન અને અવકાશ ક્ષેત્રે આગળ વધવાની ઉત્તમ તકો મળી રહી છે.
આ પણ વાંચો: Banaskanthaમાં IRM CNGના ભાવમાં તોતિંગ વધારો: પ્રતિ કિલોએ રૂ.6 ઝીંકાતા ભાવ રૂ.94ને પાર