ઉત્તરાખંડના દેહરાદૂનના પ્રેમનગર વિસ્તારમાં એક યુવકની હત્યાના કેસમાં પોલીસે તેની પત્ની અને તેના કથિત પ્રેમીની ધરપકડ કરી છે. મૃતકની ઓળખ બિહારના સહરસા જિલ્લાના રહેવાસી મદન મુખિયા તરીકે થઈ છે. પોલીસના જણાવ્યા મુજબ મદનનો મૃતદેહ મંડુવાલા વિસ્તારના જંગલમાં ખાઇમાંથી મળી આવ્યો હતો અને ગળાના ભાગે ધારદાર હથિયારના ઘાના નિશાન હતા.

જંગલની ખાઈમાંથી મળ્યો મૃતદેહ

મદન મુખિયાનો મૃતદેહ શનિવારે મંડુવાલાના જંગલ વિસ્તારમાં ખાઈમાંથી મળી આવ્યો હતો. ગળા પર ગંભીર ઈજાના નિશાન હોવાથી પ્રાથમિક તપાસમાં હત્યાની આશંકા વ્યક્ત કરવામાં આવી હતી. મૃતદેહને પોસ્ટમોર્ટમ માટે મોકલીને પોલીસે હત્યાનો ગુનો નોંધી તપાસ શરૂ કરી હતી.

CCTV અને પૂછપરછથી આરોપી સુધી પહોંચી પોલીસ

પોલીસે ઘટનાસ્થળની આસપાસ અને ત્યાં સુધી પહોંચતા રસ્તાઓ પર લાગેલા CCTV કેમેરાના ફૂટેજ તપાસ્યા હતા. સાથે જ આસપાસ કામ કરતા મજૂરોની પૂછપરછ અને બાતમીદારોની મદદથી તપાસ આગળ વધારવામાં આવી હતી. આ દરમિયાન પોલીસ લલ્લન શર્મા સુધી પહોંચી અને તેની ધરપકડ કરી હતી.

પત્ની સાથે પ્રેમસંબંધ હોવાનો પોલીસનો દાવો

પોલીસના જણાવ્યા મુજબ પૂછપરછ દરમિયાન લલ્લન શર્માએ મદનની પત્ની મીના દેવી સાથે છેલ્લા 2થી 3 વર્ષથી પ્રેમસંબંધ હોવાની વાત કહી હતી. પોલીસના દાવા મુજબ થોડા સમય પહેલાં મદનને બંને વચ્ચેના સંબંધની જાણ થઈ ગઈ હતી, ત્યારબાદ મીના અને લલ્લને કથિત રીતે મદનને રસ્તામાંથી હટાવવાનું કાવતરું ઘડ્યું હતું.

દારૂ પીવડાવવાના બહાને જંગલમાં લઈ ગયા

પોલીસના જણાવ્યા મુજબ મીના મદનને દારૂ પીવડાવવાના બહાને કોલેજ નજીકના જંગલ વિસ્તારમાં લઈ ગઈ હતી. ત્યાં મદન નશામાં હોવાનું કહેવામાં આવ્યું છે. ત્યારબાદ લલ્લનની મદદથી તેના ગળા પર ધારદાર હથિયારથી હુમલો કરવામાં આવ્યો હોવાનો પોલીસનો આરોપ છે. હત્યા બાદ મૃતદેહને ખાઈમાં ફેંકી દેવામાં આવ્યો હતો.

ઘટનામાં વપરાયેલ ચાકુ પણ મળ્યું

પોલીસે લલ્લનની કથિત નિશાનદેહી પરથી ઘટનાસ્થળ નજીકની ઝાડીઓમાંથી ચાકુ રિકવર કર્યું હોવાનું જણાવ્યું છે. મીના દેવી અને લલ્લન શર્મા બંને બિહારના સહરસા જિલ્લાના રહેવાસી હોવાનું પોલીસે જણાવ્યું છે. હાલ બંનેની ધરપકડ બાદ કેસમાં વધુ તપાસ ચાલી રહી છે.

પ્રેમસંબંધ મામલે યુવકની કૃરતાપૂર્વક હત્યા

પોલીસના જણાવ્યા મુજબ આ હત્યાકાંડ પાછળ કથિત પ્રેમસંબંધ અને મદનને બંનેના સંબંધની જાણ થઈ જવાનું કારણ હોવાનું સામે આવ્યું છે. જોકે, હત્યાની સમગ્ર હકીકત અંગે કોર્ટની કાર્યવાહી અને તપાસ આગળ વધ્યા બાદ સ્થિતિ વધુ સ્પષ્ટ થશે.  

આ પણ વાંચો  :   Bengaluru : અભિનેત્રી રાન્યા રાવ સહિત 4 પર 270.8 કરોડનો દંડ, 127 કિલોથી વધુ સોનાની કથિત તસ્કરીનો ખુલાસો