વડોદરા શહેરમાં શેરબજારમાં રોકાણના નામે સાયબર ફ્રોડનો વધુ એક કિસ્સો સામે આવ્યો છે. ફતેગંજ વિસ્તારમાં રહેતા 53 વર્ષીય વેપારીને સોશિયલ મીડિયા ગ્રૂપમાં એડ કરી સાયબર ઠગોએ HDFC Securitiesના નામે નકલી એપ ડાઉનલોડ કરાવી હતી. રોજ 20 ટકા સુધીના નફાની લાલચ આપીને વેપારી પાસેથી ટુકડે-ટુકડે 1.95 કરોડ રૂપિયા વિવિધ બેંક ખાતાઓમાં જમા કરાવ્યા હતા. સાયબર ગઠિયાઓએ વેપારીને ‘HDFC Securities The Gate of Wealth’ નામના સોશિયલ મીડિયા ગ્રૂપમાં એડ કર્યો હતો. ત્યારબાદ ગ્રૂપ એડમિન અને તેના સાગરીતોએ પોતાની કંપની SEBI રજિસ્ટર્ડ હોવાના બોગસ સર્ટિફિકેટ મોકલી વેપારીનો વિશ્વાસ જીત્યો હતો. બાદમાં વેપારી પાસે નકલી HDFC Securities એપ ડાઉનલોડ કરાવી શેરબજારમાં રોકાણ કરવા માટે પ્રેરિત કર્યો હતો. સાયબર ઠગોએ શરૂઆતમાં વિશ્વાસ કેળવવા વેપારીને 2.32 લાખ રૂપિયાનું રિફંડ આપ્યું હતું. જેના કારણે વેપારીને વધુ વિશ્વાસ આવતા તેણે અલગ-અલગ તબક્કે કુલ 1.95 કરોડ રૂપિયા વિવિધ બેંક ખાતાઓમાં જમા કરાવ્યા હતા. આ દરમિયાન નકલી એપમાં વેપારીને રૂ.6.16 કરોડનો નફો દેખાડ્યો હતો. વેપારીએ આ રકમ ઉપાડવા માટે વાત કરતા ગઠિયાઓએ વધુ રૂ.20 લાખની માંગ્યા હતા. જેથી વેપારીને શંકા ગઈ હતી અને વેપારીએ આ મામલે વડોદરા સાયબર ક્રાઇમ પોલીસ સ્ટેશનમાં ફરિયાદ નોંધાવી છે.