ગુજરાત કાઉન્સિલ ઓફ સાયન્સ એન્ડ ટેક્નોલોજી (GUJCOST) દ્વારા વિદ્યાર્થીઓમાં વિજ્ઞાન અને ટેક્નોલોજી પ્રત્યે રુચિ વધારવા સ્પર્ધાઓ યોજાય છે. આ અંતર્ગત પાટણના લોક વિજ્ઞાન કેન્દ્ર ખાતે જિલ્લા કક્ષાની રૂરલ આઈ.ટી. ક્વિઝ સ્પર્ધા યોજાઈ હતી. તેમાં પાટણ જિલ્લાની 25 શાળાઓના લગભગ 100 વિદ્યાર્થીઓએ ભાગ લીધો. શેઠ એમ.એન. હાઇસ્કૂલ, પાટણના ધોરણ-11 સાયન્સના વિદ્યાર્થીઓ પરમાર સાહિલ રાજેશભાઈ અને સથવારા ભવ્ય ભરતભાઈએ શિક્ષક રમેશભાઈ વાગડિયાના માર્ગદર્શન હેઠળ ભાગ લીધો. બંને વિદ્યાર્થીઓએ ઉત્કૃષ્ટ પ્રદર્શન કરી ટોપ ફાઈવમાં સ્થાન મેળવ્યું. પરમાર સાહિલ રાજેશભાઈએ બીજો અને સથવારા ભવ્ય ભરતભાઈએ ચોથો ક્રમ મેળવ્યો. આ સાથે બંનેની રાજ્યકક્ષાની રૂરલ આઈ.ટી. ક્વિઝ સ્પર્ધા માટે પાટણ જિલ્લાની ટીમમાં પસંદગી થઈ છે. તેઓ હવે રાજ્યકક્ષાએ પાટણ જિલ્લાનું પ્રતિનિધિત્વ કરશે. શાળાના પ્રમુખ ડૉ. જે. કે. પટેલ, મંત્રી મનસુખભાઈ પટેલ, આચાર્ય ડૉ. ધનરાજભાઈ ઠક્કર અને શાળા પરિવારે વિદ્યાર્થીઓ તથા માર્ગદર્શક શિક્ષક રમેશભાઈ વાગડિયાને અભિનંદન પાઠવી શુભેચ્છાઓ આપી.