સાઉદી અરબના બે એરપોર્ટ્સ પર હૂતી બળવાખોરોએ ડ્રોન અને મિસાઇલ હુમલા કર્યા. તેમાં 3 લોકોનાં મોત થયાં છે. સાથે જ 36 લોકો ઘાયલ પણ થયા છે. સાઉદી અરબની જનરલ ઓથોરિટી ઑફ સિવિલ એવિએશન (GACA)એ બુધવારે આ માહિતી આપી. અબહા ઇન્ટરનેશનલ એરપોર્ટ અને રિયાધના કિંગ ખાલિદ ઇન્ટરનેશનલ એરપોર્ટને 6 અને 7 ઑક્ટોબરે નિશાન બનાવવામાં આવ્યા હતા. હૂતી બળવાખોરોએ બંને હુમલાની જવાબદારી સ્વીકારી છે. અબહા એરપોર્ટ પરના હુમલામાં એક મોરોક્કન નાગરિક અને એક અલ્જેરિયન રહેવાસીનું મોત થયું. 28 લોકો ઘાયલ થયા, જેમાં સાઉદી, બાંગ્લાદેશી અને ફિલિપિન્સના નાગરિકો સામેલ છે. કિંગ ખાલિદ ઇન્ટરનેશનલ એરપોર્ટ પર એક સુદાનના નાગરિકનું મોત થયું. અહીં 8 લોકો ઘાયલ થયા, જેમાં 5 સાઉદી નાગરિકો, 2 ઇજિપ્તના રહેવાસીઓ અને એક પાકિસ્તાની રહેવાસી સામેલ છે. આ દરમિયાન, સાઉદીના નેતૃત્વવાળા ગઠબંધને જણાવ્યું કે તેણે યમનમાં હૂતીઓનાં 80થી વધુ સૈન્ય ઠેકાણાઓ પર જવાબી કાર્યવાહી કરી છે. નુકસાનનું મૂલ્યાંકન કરવામાં આવી રહ્યું છે GACAએ જણાવ્યું કે તે સંબંધિત અધિકારીઓ સાથે મળીને નુકસાનનું મૂલ્યાંકન કરી રહ્યું છે. અધિકારીઓ સુવિધાઓની સુરક્ષાની તપાસ કરી રહ્યા છે અને મુસાફરોની સલામતી માટે જરૂરી પગલાં લઈ રહ્યા છે. હૂતી સૈન્ય પ્રવક્તા યાહ્યા સારી અનુસાર, જૂથે કિંગ ખાલિદ એરપોર્ટ પર ડ્રોનથી હુમલો કર્યો. અબહા એરપોર્ટને બેલિસ્ટિક મિસાઇલો અને ડ્રોનથી નિશાન બનાવવામાં આવ્યું. આ હુમલા યમનમાં વધતા સંઘર્ષ વચ્ચે થયા છે. ત્યાં સાઉદી સમર્થિત સરકારી દળોએ બાબ અલ-મંદેબ જળમાર્ગ અને પશ્ચિમ કિનારાના વિસ્તારોમાં હૂતીઓ વિરુદ્ધ અભિયાન શરૂ કર્યું છે. સાઉદી દળોએ એમ પણ જણાવ્યું કે તેમણે રિયાધની ઉત્તરે એક બેલિસ્ટિક મિસાઇલને અટકાવી હતી. તેમણે સનામાં એક લૉન્ચ પ્લેટફોર્મ પણ નષ્ટ કર્યું.