પૂર્વ ભારતીય ફાસ્ટ બોલર મોહીત શર્માએ પોતાના કરિયરમાં એમએસ ધોનીના યોગદાનને યાદ કર્યું છે. મોહીતે કહ્યું કે ધોનીની કેપ્ટનશિપમાં લાંબા સમય સુધી રમવાનો તેને ફાયદો થયો અને ધોનીએ તેના કરિયર પર મોટી અસર કરી. મોહીત ભારત ઉપરાંત ચેન્નાઈ સુપર કિંગ્સમાં પણ ધોનીની કેપ્ટનશિપ હેઠળ રમી ચૂક્યો છે.
‘માહી ભાઈને ખેલાડીઓની તાકાત-નબળાઈ ખબર હતી’
મોહીતે એએનઆઈ સાથે વાત કરતાં કહ્યું કે ધોની સાથે રમવાનો અનુભવ શાનદાર રહ્યો. તેણે કહ્યું કે ભારત માટે તેણે પોતાની કારકિર્દીનો મોટો હિસ્સો ધોનીની કેપ્ટનશિપમાં રમ્યો અને જ્યારે કોઈ ખેલાડી લાંબા સમય સુધી એક જ કેપ્ટન સાથે રમે છે ત્યારે કેપ્ટન તેની તાકાત અને નબળાઈને સારી રીતે સમજી લે છે. મોહીતે કહ્યું, “હું ભાગ્યશાળી હતો કે ભારત માટે મેં મોટાભાગની ક્રિકેટ માહી ભાઈની કેપ્ટનશિપમાં રમી. ફ્રેન્ચાઈઝી ક્રિકેટમાં પણ હું એવી ટીમનો ભાગ હતો જ્યાં માહી ભાઈ કેપ્ટન હતા. મારા કરિયર પર તેમની મોટી અસર રહી છે અને તેમના માટે મારા મનમાં ખૂબ આભાર છે.”
ધોનીની આ ખાસિયત મોહીતને સૌથી વધુ પસંદ હતી
જ્યારે મોહીતને પૂછવામાં આવ્યું કે ધોનીને અન્ય કેપ્ટનથી શું અલગ બનાવે છે, ત્યારે તેણે સીધી સરખામણી કરવાનો ઇનકાર કર્યો. જોકે તેણે ધોનીની મેચની સ્થિતિને સમજવાની ક્ષમતાના ખાસ વખાણ કર્યા. મોહીતના જણાવ્યા અનુસાર, ધોની મુશ્કેલ પરિસ્થિતિમાં એક જ ઉકેલ પર આધાર રાખવાને બદલે અલગ-અલગ રસ્તા શોધી શકતા હતા. તેમણે કહ્યું કે ધોની સ્થિતિ પ્રમાણે ખૂબ સમજદારીથી નિર્ણય લેતા હતા અને આ તેમની મોટી ખાસિયત હતી.
CSKની સફળતાનું રહસ્ય પણ જણાવ્યું
મોહીતે ચેન્નાઈ સુપર કિંગ્સની લાંબા સમયની સફળતા પાછળ ટીમના ડ્રેસિંગ રૂમના વાતાવરણને મોટું કારણ ગણાવ્યું. તે CSK માટે લગભગ 4થી 5 વર્ષ રમ્યો છે અને આ દરમિયાન તેણે ટીમની અંદરની સંસ્કૃતિને નજીકથી જોઈ છે. મોહીતે કહ્યું કે CSKનું ધ્યાન માત્ર મેદાન પર મેચ જીતવા પર નથી હોતું. ટીમ પહેલાં ડ્રેસિંગ રૂમમાં સારો માહોલ બનાવે છે. ખેલાડીઓ વચ્ચે સારા સંબંધો અને એકસરખી વિચારસરણી ઊભી કરવી ટીમની ફિલોસોફીનો મહત્વનો ભાગ છે.
‘પહેલાં ડ્રેસિંગ રૂમ જીતો, પછી મેદાન’
મોહીતે કહ્યું કે CSK સાથે જોડાયેલી સૌથી સારી વાત તેને એ લાગી કે ટીમ મેનેજમેન્ટ, ધોની, સ્ટીફન ફ્લેમિંગ, ફિઝિયો અને ટ્રેનર્સ સહિત દરેક વ્યક્તિની વિચારસરણી એકસરખી હતી. તેણે કહ્યું કે ટીમની ફિલોસોફી “પહેલાં ડ્રેસિંગ રૂમ જીતો અને પછી મેદાન પર જીતો” જેવી રહી છે. મોહીતના મતે સ્વસ્થ ડ્રેસિંગ રૂમનું વાતાવરણ ટીમની લાંબા સમયની સફળતા માટે ખૂબ મહત્વનું છે.
ધોનીનો શાનદાર કેપ્ટનશિપ રેકોર્ડ
એમએસ ધોની ભારતના સૌથી સફળ કેપ્ટનોમાંથી એક છે. તેણે ભારતની 332 આંતરરાષ્ટ્રીય મેચમાં કેપ્ટનશિપ કરી હતી. તેની કેપ્ટનશિપમાં ભારતે 2007નો T20 વર્લ્ડ કપ, 2011નો ODI વર્લ્ડ કપ અને 2013ની ચેમ્પિયન્સ ટ્રોફી જીતી હતી. તે ત્રણેય મોટી ICC લિમિટેડ ઓવર્સ ટ્રોફી જીતનાર એકમાત્ર ભારતીય કેપ્ટન છે.