માં અંબાની આરાધનાના પવિત્ર પર્વ નવરાત્રિના આગમનને હવે ગણતરીના માત્ર બે જ દિવસોની વાર છે, ત્યારે અમદાવાદ શહેર અને ગ્રામ્ય વિસ્તારના ગરબા આયોજકો મોટી વિમાસણમાં મુકાયા છે. શહેર અને ગ્રામ્ય વિસ્તારમાં ગરબા મહોત્સવના ભવ્ય આયોજન માટે પોલીસ અને સ્થાનિક તંત્ર પાસેથી મેળવવાની થતી સત્તાવાર મંજૂરીઓ અટકી પડી છે. ફાયર એનઓસી (Fire NOC) સહિતના અન્ય મહત્વના દસ્તાવેજો અને કાગળો અપૂરતા હોવાના કારણે તંત્ર દ્વારા મંજૂરીઓ અટકાવી દેવામાં આવી છે.
અમદાવાદ શહેરમાં 81 આયોજકોની અરજીઓ અટકી
મળતી વિગતો અનુસાર, અમદાવાદ શહેર પોલીસ સીમામાં વિવિધ ક્લબ, પાર્ટી પ્લોટ અને ગ્રાઉન્ડ પર ગરબાનું આયોજન કરવા માટે 81 જેટલા આયોજકોએ મંજૂરી માટે અરજી કરી છે. જોકે, ફાયર સેફ્ટીના નિયમો અને જરૂરી ડોક્યુમેન્ટ્સ પૂર્ણ ન હોવાથી હજુ સુધી એકપણ આયોજકની મંજૂરી ફાઈનલ થઈ શકી નથી. બીજી તરફ અમદાવાદ ગ્રામ્ય પોલીસ વિસ્તારમાં ગરબા યોજવા માટે 18 આયોજકોએ મંજૂરી માંગી હતી, જેમાંથી તમામ નિયમો અને કાગળો પૂર્ણ કરનારા માત્ર 2 જ આયોજકોને ગ્રામ્ય પોલીસે મંજૂરી આપી છે.
ખેલૈયાઓ અને આયોજકોમાં ભારે અસમંજસ
તંત્ર દ્વારા ગરબા સ્થળો પર આવતા હજારો ખેલૈયાઓ અને નાગરિકોની સુરક્ષાને લઈને કોઈ પણ પ્રકારની બાંધછોડ કરવામાં આવી રહી નથી. સુરક્ષાના આકરા નિયમો અને ફાયર એનઓસી મેળવવામાં થતા વિલંબના કારણે બાકીના તમામ આયોજકો હાલ મંજૂરી મેળવવા સરકારી કચેરીઓના ચક્કર કાપી રહ્યા છે. નવરાત્રિ શરૂ થવામાં હવે ગણતરીના કલાકો જ બાકી છે ત્યારે સમયસર મંજૂરી મળશે કે કેમ તેને લઈને આયોજકો અને ખેલૈયાઓમાં ભારે ચિંતા અને અસમંજસનો માહોલ જોવા મળી રહ્યો છે.