અરવલ્લી જિલ્લાના મેઘરજ તાલુકાના નેસડા ગામેથી એક અત્યંત હૃદયદ્રાવક અને દુઃખદ સમાચાર સામે આવ્યા છે. નેસડા ગામના એક કૂવામાંથી 24 વર્ષીય પરિણીત મહિલા અને તેની માસૂમ 2 વર્ષની બાળકીના શંકાસ્પદ હાલતમાં મૃતદેહ મળી આવ્યા હતા. આ ઘટનાને પગલે સમગ્ર પંથકમાં ભારે શોક અને અરેરાટીની લાગણી વ્યાપી ગઈ છે.

ઘરકામ અને પગાર બાબતે ત્રાસ આપ્યાના ગંભીર આક્ષેપ

મૃતક મહિલાના પિતા દ્વારા કરવામાં આવેલી ફરિયાદ મુજબ, સાસરિયાઓ દ્વારા પરિણીતાને અવારનવાર શારીરિક અને માનસિક ત્રાસ આપવામાં આવતો હતો. ઘરકામ બાબતે તેમજ દૂધના પગારના હિસાબ સહિતની અંગત બાબતોને લઈને સાસરિયાઓ દ્વારા તેને ભારે હેરાનગતિ કરવામાં આવતી હોવાના ગંભીર આક્ષેપો કરવામાં આવ્યા છે.

પાંચ સાસરિયાં સામે ગુનો નોંધી પતિની ધરપકડ

પિતાની આ ફરિયાદના આધારે મેઘરજ પોલીસે ત્વરિત કાર્યવાહી હાથ ધરી છે. પોલીસે મૃતકના પતિ મહેશભાઈ ડામોર સહિત સાસુ, સસરા, જેઠ અને જેઠાણી એમ કુલ પાંચ સાસરિયાં સામે ગુનો નોંધ્યો છે. આ કેસની ગંભીરતાને ધ્યાનમાં રાખીને પોલીસે ગણતરીના કલાકોમાં જ આરોપી પતિ મહેશભાઈ ડામોરને ઝડપી પાડ્યો છે અને આગળની કાયદેસરની તપાસ શરૂ કરી છે.

આ પણ વાંચો: Aravalli News: મોડાસાના કચ્છી સમાજના બે વડીલોનું પ્રેરણાદાયી દેહદાન, દાહોદ મેડિકલ કોલેજ મોકલાયા