મહીસાગર જિલ્લાના લુણાવાડામાં એસ.કે. હાઈસ્કૂલની મેઈન બ્રાન્ચ ખાતે આગ જેવી આપત્તિ માટે મોકડ્રિલ યોજાઈ હતી. જિલ્લા ઈમરજન્સી ઓપરેશન સેન્ટર અને લુણાવાડા નગરપાલિકાના ફાયર વિભાગે આ મોકડ્રિલ કરી હતી. તેનો હેતુ વિદ્યાર્થીઓને સુરક્ષિત બહાર કાઢવા અને બચાવ કામગીરી અંગે જાગૃત કરવાનો હતો. મોકડ્રિલમાં એક વર્ગખંડમાં આગ લાગી હોવાની પરિસ્થિતિ ઊભી કરાઈ. ફાયર એલાર્મ વાગતા જ વિદ્યાર્થીઓને સુરક્ષિત રીતે ગ્રાઉન્ડમાં ભેગા કરાયા. ધુમાડાને કારણે બેભાન થયેલા એક વિદ્યાર્થીને ફાયર વિભાગે બચાવ્યો. તેને 108 ઈમરજન્સી સેવા દ્વારા સરકારી હોસ્પિટલ મોકલવાની કામગીરી પણ કરાઈ. આગની જાણ થતા જ ફાયર વિભાગની બે ગાડીઓ ઘટનાસ્થળે પહોંચી. તેમણે આગ પર કાબૂ મેળવવા સહિતની બચાવ કામગીરીનું નિદર્શન કર્યું. આ મોકડ્રિલથી વિદ્યાર્થીઓ અને શાળા સંચાલકોને આગ જેવી કટોકટીમાં સતર્ક રહેવા અને બચાવ વ્યવસ્થાની સમજ અપાઈ.