દક્ષિણ આફ્રિકાના દિગ્ગજ બેટર એબી ડિવિલિયર્સે ફરી એકવાર પોતાની વિસ્ફોટક બેટિંગથી ક્રિકેટપ્રેમીઓનું દિલ જીતી લીધું છે. વર્લ્ડ ચેમ્પિયન્સ ઓફ લેજન્ડ્સની ત્રીજી સિઝનમાં 9 ઓક્ટોબરે શારજાહના મેદાન પર ડિવિલિયર્સે ઓસ્ટ્રેલિયા ચેમ્પિયન્સ સામે તોફાની બેટિંગ કરી હતી. તેણે માત્ર 37 બોલમાં સદી ફટકારી હતી અને 40 બોલમાં અણનમ 111 રન બનાવ્યા હતા.

ડિવિલિયર્સની ધમાકેદાર ઇનિંગ

ડિવિલિયર્સની આ ઇનિંગના કારણે દક્ષિણ આફ્રિકા ચેમ્પિયન્સે 210 રનનો લક્ષ્યાંક માત્ર 15.4 ઓવરમાં હાંસલ કરી લીધો હતો. ટીમે 8 વિકેટથી શાનદાર જીત મેળવી હતી. ક્રિકેટની દુનિયામાં મિસ્ટર 360 ડિગ્રી તરીકે જાણીતા ડિવિલિયર્સે ફરી એકવાર પોતાની જૂની આક્રમક શૈલીની ઝલક બતાવી હતી.

40 બોલમાં 111 રન, 11 છગ્ગા અને 6 ચોગ્ગા

ઓસ્ટ્રેલિયા ચેમ્પિયન્સ સામે 210 રનના લક્ષ્યાંકનો પીછો કરવા ઉતરેલી દક્ષિણ આફ્રિકા ચેમ્પિયન્સની શરૂઆત સારી રહી નહોતી. ટીમે માત્ર 12 રનના સ્કોર પર ફાફ ડુ પ્લેસિસની વિકેટ ગુમાવી દીધી હતી.ત્યાર બાદ ત્રીજા ક્રમે બેટિંગ કરવા આવેલા એબી ડિવિલિયર્સે મોરચો સંભાળ્યો હતો. તેણે શરૂઆતથી જ આક્રમક બેટિંગ કરીને ઓસ્ટ્રેલિયાના બોલરોને દબાણમાં મૂકી દીધા હતા. ડિવિલિયર્સે માત્ર 37 બોલમાં પોતાની સદી પૂરી કરી હતી.તેની 40 બોલની અણનમ ઇનિંગમાં 11 છગ્ગા અને 6 ચોગ્ગાનો સમાવેશ થયો હતો. તેનો સ્ટ્રાઇક રેટ 277.50નો રહ્યો હતો. આ આંકડા તેની તોફાની બેટિંગની સાબિતી આપે છે.

રિચર્ડ લેવી સાથે કરી 127 રનની ભાગીદારી

ડિવિલિયર્સે બીજા છેડે રિચર્ડ લેવી સાથે મળીને શાનદાર બેટિંગ કરી હતી. બંને વચ્ચે બીજી વિકેટ માટે 127 રનની ભાગીદારી થઈ હતી. આ ભાગીદારીએ દક્ષિણ આફ્રિકાની જીતનો માર્ગ સરળ બનાવ્યો હતો.ડિવિલિયર્સે મેદાનની ચારે બાજુ શોટ ફટકાર્યા હતા. તેના આક્રમક અંદાજ સામે ઓસ્ટ્રેલિયા ચેમ્પિયન્સના બોલરો પાસે કોઈ અસરકારક જવાબ જોવા મળ્યો નહોતો. અંતે દક્ષિણ આફ્રિકાની ટીમે 15.4 ઓવરમાં જ લક્ષ્યાંક હાંસલ કરી લીધો હતો.

પોઇન્ટ ટેબલમાં દક્ષિણ આફ્રિકા ચેમ્પિયન્સ પ્રથમ સ્થાને

ઓસ્ટ્રેલિયા સામેની આ જીત સાથે દક્ષિણ આફ્રિકા ચેમ્પિયન્સ વર્લ્ડ ચેમ્પિયન્સ ઓફ લેજન્ડ્સની ત્રીજી સિઝનના પોઇન્ટ ટેબલમાં પ્રથમ સ્થાને પહોંચી હતી. ટીમે અત્યાર સુધી રમેલી બંને મેચમાં જીત મેળવી હતી અને તેના ખાતામાં 4 પોઇન્ટ હતા. તેનો નેટ રન રેટ 3.823 નોંધાયો હતો.હવે દક્ષિણ આફ્રિકા ચેમ્પિયન્સની આગામી મેચ 10 ઓક્ટોબરે ઇન્ડિયા ચેમ્પિયન્સ સામે રમાવાની છે. આ મુકાબલામાં ચાહકોની નજર યુવરાજ સિંહ પર પણ રહેશે. યુવરાજે ઓસ્ટ્રેલિયા ચેમ્પિયન્સ સામેની મેચમાં 71 રનની શાનદાર ઇનિંગ રમી હતી.

આ પણ વાંચો – Sanju Samsonની ધમાકેદાર અડધી સદી, 21 બોલમાં રચ્યો ઇતિહાસ