બીલીમોરાના એલ.એમ.પી. ગરબા ગ્રાઉન્ડમાં વિઘ્નહર્તા યુવક મંડળે નવરાત્રી મહોત્સવ 2026નું આયોજન કર્યું છે. આ મહોત્સવ દરમિયાન મંડળે એક સેવા કાર્ય શરૂ કર્યું છે. મંડળ બીલીમોરાની 60 અતિ કુપોષિત સગર્ભા મહિલાઓ અને 50 કુપોષિત બાળકોને એક વર્ષ સુધી પોષણવાળો આહાર આપશે. આ પહેલનો મુખ્ય હેતુ માતાઓ અને બાળકોના પોષણ તેમજ આરોગ્ય વિશે જાગૃતિ લાવવાનો છે. આ ઉપરાંત, જરૂરિયાતમંદ પરિવારોને મદદ કરવાનો પણ છે. વિઘ્નહર્તા યુવક મંડળે જણાવ્યું કે, નવરાત્રી માત્ર ધાર્મિક ઉત્સવ નથી, પણ માનવસેવા અને સમાજ પ્રત્યેની જવાબદારી નિભાવવાનો મોકો છે. મંડળ ઘણા વર્ષોથી સામાજિક સેવાના કામો કરે છે. મંડળે અન્ય દાતાઓ અને સંસ્થાઓને પણ આ સેવા કાર્યમાં જોડાવા અપીલ કરી છે. આ કાર્યક્રમના આયોજક મનીષભાઈ દેસાઈ (ગુલીટ) છે.