અમેરિકાના રાષ્ટ્રપતિ ડોનાલ્ડ ટ્રમ્પે શુક્રવારે કેટી જકારિયાને વ્હાઇટ હાઉસની નવી પ્રેસ સેક્રેટરી બનાવવાની જાહેરાત કરી. કેરોલિના લેવિટે પદ છોડ્યા બાદ લગભગ બે મહિનાથી આ પદ ખાલી હતું. જકારિયા કેલિફોર્નિયાની વકીલ અને કન્ઝર્વેટિવ વિચારોવાળી કોમેન્ટેટર છે. તે ટ્રમ્પની મોટી સમર્થક છે અને ઘણી વખત તેમની ભારે પ્રશંસા કરી ચૂકી છે. નિમણૂકની જાહેરાત કરતાં ટ્રમ્પે કહ્યું કે જકારિયાનો તેમને સમર્થન આપવાનો રેકોર્ડ નિષ્કલંક છે. ટ્રમ્પે તેને વફાદાર અને પ્રતિભાશાળી સમર્થક ગણાવી છે. કેટી જકારિયા પહેલાં સતત 6 મહિલાઓ આ પદની જવાબદારી સંભાળી ચૂકી છે. છેલ્લે પુરુષ પ્રેસ સેક્રેટરી શૉન સ્પાઇસર હતા, જેમણે 2017માં ટ્રમ્પના પ્રથમ કાર્યકાળની શરૂઆતમાં આ પદ સંભાળ્યું હતું. 42 વર્ષીય કેટી જકારિયાને ચાર બાળકોની માતા છે. કેટી જકારિયાએ વ્હાઇટ હાઉસ પ્રેસ સેક્રેટરી તરીકે સેવા આપવાની ખાસ તક આપવા બદલ રાષ્ટ્રપતિ ટ્રમ્પનો આભાર વ્યક્ત કર્યો હતો. ટ્રમ્પે નિર્ણય લેતા પહેલાં લેવિટની પણ સલાહ લીધી ટ્રમ્પે આ નિર્ણય લેતા પહેલાં પોતાના ઘણા નજીકના સલાહકારો સાથે વાત કરી હતી. તેમાં ભૂતપૂર્વ પ્રેસ સેક્રેટરી કેરોલિના લેવિટ પણ સામેલ હતી. પોતાના બીજા બાળકને જન્મ આપ્યા બાદ લેવિટે ઑગસ્ટના અંતમાં વહીવટીતંત્ર છોડી દીધું હતું. તેનું સ્થાન લેવા માટે CNNના કન્ઝર્વેટિવ કમેન્ટેટર સ્કોટ જેનિંગ્સ, ટ્રમ્પના ભૂતપૂર્વ વકીલ અલિના હબ્બા અને ડેપ્યુટી પ્રેસ સેક્રેટરી એના કેલીનાં નામોની પણ ચર્ચા થઈ હતી. લગભગ બે મહિના સુધી પ્રેસ સેક્રેટરીનું પદ ખાલી રહેવાને કારણે વ્હાઇટ હાઉસના પ્રેસ બ્રીફિંગ રૂમમાં છેલ્લી બ્રીફિંગ 3 સપ્ટેમ્બરે યોજાઈ હતી. જકારિયા ટ્રમ્પની કંપનીમાં પણ કામ કરી ચૂકી છે 42 વર્ષીય કેટી જકારિયાને ચાર બાળકો છે. તે કેલિફોર્નિયાના વેસ્ટલેક વિલેજમાં રહે છે. તેણે ગ્રેજ્યુએશન અને કાયદાનો અભ્યાસ પેપરડાઇન યુનિવર્સિટીમાંથી કર્યો છે. જૂનથી તે ટ્રમ્પ મીડિયા એન્ડ ટેક્નોલોજી ગ્રુપમાં સિનિયર કમ્યુનિકેશન એડવાઇઝર તરીકે કામ કરી રહી હતી. આ એ જ કંપની છે જે ટ્રમ્પના સોશિયલ મીડિયા પ્લેટફોર્મ ‘ટ્રુથ સોશિયલ’નું સંચાલન કરે છે. આ ઉપરાંત, છેલ્લા એક વર્ષમાં તે ફોક્સ ન્યૂઝ અને ન્યૂઝમેક્સ પર ઘણી વખત જોવા મળી છે. જકારિયાએ પોતાને ફોક્સ ન્યૂઝની કમેન્ટેટર પણ ગણાવી છે. જોકે, ચેનલે સ્પષ્ટ કર્યું છે કે તે ત્યાં ક્યારેય કર્મચારી રહી નથી. અહેવાલો અનુસાર, ટ્રમ્પે જકારિયાને ટીવી પર જોયા બાદ પસંદ કરી હતી. જકારિયાએ ટીવી કાર્યક્રમોમાં જ નહીં, પરંતુ લાંબા લેખો લખીને પણ ટ્રમ્પના નેતૃત્વ અને તેમની રાજકીય સિદ્ધિઓની પ્રશંસા કરી છે. જકારિયાએ નેતન્યાહૂ વિરુદ્ધ ધરપકડ વોરંટનો વિરોધ કર્યો હતો જકારિયા ફોક્સ ન્યૂઝ જેવી મોટી અમેરિકન ન્યૂઝ ચેનલો પર ટ્રમ્પની નીતિઓનો બચાવ કરતી રહી છે. તેમણે ટ્રમ્પને અમેરિકન રાજકારણના અત્યાર સુધીના સૌથી મોટો ખેલાડી ગણાવ્યા હતા અને તેમની સરખામણી રમતજગતના દિગ્ગજો સાથે કરી હતી. જકારિયાના વિચારો ટ્રમ્પ સાથે ઘણાં મળતા આવે છે. તેણે ઇઝરાયલી વડાપ્રધાન બેન્જામિન નેતન્યાહૂ વિરુદ્ધ ઇન્ટરનેશનલ ક્રિમિનલ કોર્ટના ધરપકડ વોરંટનો પણ વિરોધ કર્યો હતો. તે ઈરાન વિરુદ્ધ પણ કડક વલણ ધરાવે છે. જુલાઈમાં જકારિયાએ ન્યૂયોર્કના મેયર જોહરાન મમદાનીની ટીકા કરી હતી. મમદાનીએ કહ્યું હતું કે નેતન્યાહૂ ન્યૂયોર્ક આવે ત્યારે તેમની ધરપકડ કરાવવાનાં પગલાં લેવામાં આવી શકે છે. આ અંગે જકારિયાએ કહ્યું હતું કે મમદાની એવું વર્તન કરે છે, જાણે તેઓ કોઈ સ્વતંત્ર દેશના શાસક હોય. ટ્રમ્પે કહ્યું હતું- લેવિટને મારા કરતાં પોતાનાં બાળકો વધુ પસંદ છે લેવિટ 27 વર્ષની ઉંમરે અમેરિકાની સૌથી નાની વયની વ્હાઇટ હાઉસ પ્રેસ સેક્રેટરી બની હતી. તેમણે 12 ઓગસ્ટે આ પદ છોડવાની જાહેરાત કરી હતી. તે સમયે ટ્રમ્પે તેમને પોતાના સૌથી વિશ્વાસુ સહયોગીઓમાંની એક ગણાવી હતી. લેવિટે ઓગસ્ટમાં પોતાના બે બાળકો સાથે વધુ સમય વિતાવવા માટે વ્હાઇટ હાઉસનું પદ છોડી દીધું હતું. ટ્રમ્પે તેમના પદ છોડ્યા બાદ મજાકમાં કહ્યું હતું, મને જાણવા મળ્યું છે કે કેરોલિના લેવિટ મને પસંદ કરવા કરતાં પોતાનાં બાળકોને વધુ પસંદ કરે છે. હું તેને લઈને ખૂબ ચિંતિત છું. પરંતુ લેવિટનું સ્થાન લેવું સરળ નહીં હોય લેવિટે 1 મે 2026ના રોજ પોતાના બીજા બાળકને જન્મ આપ્યો હતો. લેવિટે કહ્યું કે તે પોતાના પરિવાર અને બે નાના બાળકોને વધુ સમય આપવા માગે છે. કેરોલિન લેવિટ અમેરિકાના ન્યૂ હેમ્પશાયરની રહેવાસી છે.