મણિપુરમાં કુકી અને નાગા સમુદાયો વચ્ચેનો તણાવ ફરી હિંસક બન્યો છે. રાજ્યના અલગ-અલગ વિસ્તારોમાં છેલ્લા 24 કલાક દરમિયાન થયેલી ગોળીબારી અને હુમલામાં 9 લોકોનાં મોત થયાં છે. મૃતકોમાં એક મહિલા, નાગા વિલેજ ગાર્ડ અને નેપાળી સમુદાયના એક વ્યક્તિનો પણ સમાવેશ થાય છે. આ દરમિયાન બંને સમુદાયોનાં ઓછામાં ઓછાં 14 ઘરોમાં આગ લગાડવામાં આવી હોવાના અહેવાલ છે. ઘટનાઓ બાદ અસરગ્રસ્ત વિસ્તારોમાં તણાવ વધી ગયો છે. 

કામજોંગમાં મહિલાના મોત બાદ સ્થિતિ વણસી

હિંસાની શરૂઆત શુક્રવાર, 9 ઓક્ટોબરની રાત્રે કામજોંગ જિલ્લાના ચસાડ ગામ નજીક થઈ હતી. અહીં 42 વર્ષીય કુકી મહિલા ડોમખોની ટૌથાંગનું ગોળી વાગવાથી મોત થયું હતું. તે પાંચ બાળકોની માતા હતી. પોલીસના જણાવ્યા અનુસાર, ચસાડ પોલીસ સ્ટેશન નજીક કથિત ગેરકાયદે બંકરો હટાવવા માટે સુરક્ષા દળોએ કાર્યવાહી શરૂ કરી હતી. આ દરમિયાન અજાણ્યા હથિયારધારીઓએ સુરક્ષાકર્મીઓ પર ગોળીબાર કર્યો હતો અને જવાબમાં સુરક્ષા દળોએ પણ ગોળીબાર કર્યો હતો. આ ઘટનામાં મહિલાને ગોળી વાગી હતી અને તેનું મોત થયું હતું. જોકે, કુકી સંગઠનોનું કહેવું છે કે ગામના સ્વયંસેવકોની ધરપકડના વિરોધમાં ચાલી રહેલા પ્રદર્શનમાં મહિલા હાજર હતી ત્યારે તેને ગોળી વાગી હતી. ઘટનાની પરિસ્થિતિ અંગે અલગ-અલગ દાવા સામે આવ્યા છે. 

નિંગચો ગામમાં બે નાગા વિલેજ ગાર્ડનાં મોત

કામજોંગ જિલ્લામાં શનિવાર, 10 ઓક્ટોબરની સવારે હિંસાની બીજી ઘટના સામે આવી હતી. નિંગચો ચિંગડોંગ ગામમાં થયેલા હુમલામાં 2 નાગા વિલેજ ગાર્ડનાં મોત થયાં હતાં. પોલીસના જણાવ્યા પ્રમાણે, આ ગામ ચસાડ પોલીસ સ્ટેશનથી લગભગ 17 કિલોમીટર દક્ષિણ-પૂર્વમાં આવેલું છે. એક વરિષ્ઠ પોલીસ અધિકારીએ જણાવ્યું હતું કે ભારત-મ્યાનમાર સરહદ નજીક સક્રિય હથિયારધારી જૂથોની આ હુમલામાં સંડોવણી હોવાની આશંકા છે. જોકે, આ અંગે સત્તાવાર પુષ્ટિ થઈ નથી અને તપાસ ચાલુ છે. 

કાંગપોકપીમાં હુમલો, એક નાગા સ્વયંસેવકનું મોત

કાંગપોકપી જિલ્લામાં પણ હિંસાની ગંભીર ઘટના બની હતી. માકુઈ અને તાપોક ગામ વચ્ચે ઇમ્ફાલ-તામેંગલોંગ રોડ પર હથિયારધારીઓએ ઘાત લગાવીને હુમલો કર્યો હતો. આ હુમલામાં એક નાગા વિલેજ વોલન્ટિયરનું મોત થયું હતું, જ્યારે અન્ય 2 લોકો ઘાયલ થયા હતા. પોલીસના જણાવ્યા અનુસાર, નાગા સ્વયંસેવકોને માકુઈ ગામ પર હુમલો થયાની માહિતી મળી હતી. ત્યારબાદ તેઓ ઘટનાસ્થળ તરફ જઈ રહ્યા હતા ત્યારે તેમના પર હુમલો કરવામાં આવ્યો હતો. ઘાયલોને સારવાર માટે સેનાપતિ જિલ્લા મુખ્યાલય લઈ જવામાં આવ્યા હતા. બીજી તરફ, ઉખરુલ જિલ્લામાં નેશનલ હાઇવે-202 પર અજાણ્યા હથિયારધારીઓએ કારમાં જઈ રહેલા 30 વર્ષીય સંદીપ રાય પર હુમલો કર્યો હતો. આ ઘટનામાં તેમનું મોત થયું હતું. સંદીપ રાય નેપાળી સમુદાયના હતા અને તેઓ સેનાપતિ વિસ્તાર નજીક રહેતા હતા. હુમલા પાછળનું કારણ અને જવાબદાર લોકોની ઓળખ અંગે તપાસ ચાલી રહી છે. 

24 કલાકના બંધનું એલાન 

પરિસ્થિતિ વધુ બગડે નહીં તે માટે કામજોંગ જિલ્લા વહીવટીતંત્રે ચસાડ પોલીસ સ્ટેશનના ગેટ જંક્શનથી 400 મીટરના વિસ્તારમાં લોકોના એકઠા થવા પર પ્રતિબંધ મૂક્યો હતો. દરમિયાન, કુકી સંગઠન કમિટી ઑન ટ્રાઇબલ યુનિટી (CoTU)એ કાંગપોકપી જિલ્લામાં શનિવાર સાંજે 6 વાગ્યાથી 24 કલાકના બંધનું એલાન આપ્યું હતું. આ નિર્ણયથી સ્થાનિક જનજીવન અને વાહનવ્યવહાર પર અસર થવાની શક્યતા છે. 

10 ઓક્ટોબરની ઘટનાઓ બાદ પણ અનેક વિસ્તારોમાં તણાવ યથાવત્ છે. અલગ-અલગ હુમલાઓમાં કોણ જવાબદાર છે તે અંગે કેટલાક દાવા સામે આવ્યા છે, પરંતુ તમામ ઘટનાઓમાં હુમલાખોરોની ઓળખ અને તેમની સંડોવણીની સત્તાવાર પુષ્ટિ થઈ નથી. હાલ પોલીસ તપાસ અને સુરક્ષા વ્યવસ્થા પર ધ્યાન કેન્દ્રિત કરવામાં આવી રહ્યું છે.

આ પણ વાંચો: CJP પ્રદર્શન મુદ્દે હવે UNની એન્ટ્રી, પ્રદર્શનકારીઓની અટકાયત પર વ્યક્ત કરી ચિંતા