ગુજરાતભરમાં આદ્યશક્તિની આરાધનાના મહાપર્વ નવરાત્રિ મહોત્સવનો આજથી ઉત્સાહભેર પ્રારંભ થઈ ચૂક્યો છે. જો કે, સુરત શહેરમાં ગરબા આયોજકો માટે આ પર્વ શરૂઆતથી જ મુશ્કેલીઓ લઈને આવ્યો છે. સુરત શહેરમાં મોટા પાયે ગરબાનું આયોજન કરનાર આયોજકોને પોલીસ અને વહીવટી તંત્ર તરફથી મંજૂરી મેળવવામાં ભારે હાલાકીનો સામનો કરવો પડી રહ્યો છે, જેના કારણે ખેલૈયાઓમાં પણ ચિંતા જોવા મળી રહી છે.

84 આયોજકોએ કરી હતી અરજી, પરંતુ માત્ર 40 ને જ મળી મંજૂરી

પ્રાપ્ત વિગતો અનુસાર, સુરત શહેરમાં વિવિધ સ્થળોએ ગરબાના આયોજન માટે કુલ 84 જેટલા આયોજકોએ મંજૂરી માટે અરજી કરી હતી. સુરત પોલીસ અને ફાયર વિભાગ દ્વારા કડક સુરક્ષા અને સલામતીના માપદંડોની ચકાસણી બાદ અત્યાર સુધી માત્ર 40 આયોજકોને જ ગરબા યોજવા માટે સત્તાવાર મંજૂરી આપવામાં આવી છે. જ્યારે હજુ પણ બાકી રહેલા 44 આયોજકો ફાયર એનઓસી (NOC) અને પોલીસ પરવાનગી મેળવવા માટે દરવાજે દરવાજે ધક્કા ખાવા મજબૂર બન્યા છે.

મંજૂરી માટે આયોજકોની કવાયત યથાવત

નવરાત્રિનો પ્રથમ દિવસ શરૂ થઈ ગયો હોવા છતાં અનેક આયોજકો હજુ પણ મંજૂરી મેળવવા માટે પોલીસ અને મ્યુનિસિપલ કમિશનર કચેરીના ચક્કર કાપી રહ્યા છે. ફાયર વિભાગનું સર્ટિફિકેટ અને પોલીસ મંજૂરી ફરજિયાત હોવાથી આયોજકોમાં દોડધામ મચી ગઈ છે. તંત્ર દ્વારા સલામતીને સર્વોપરી રાખીને કડક નિયમોનું પાલન કરાવવામાં આવી રહ્યું છે, જેના કારણે બાકી રહેલા આયોજકો પર સમયનું દબાણ વધી ગયું છે.

આ પણ વાંચો : Gandhinagar મનપા ચૂંટણીમાં વોર્ડ નં 11 માં ભારે બબાલ, ભાજપ અને કોંગ્રેસના કાર્યકરો સામસામે આવ્યા