વડોદરા-અમદાવાદ નેશનલ હાઈવે પર આવેલા દેણા ચોકડી નજીક એક અત્યંત ચોંકાવનારી અને સનસનાટીભરી ચોરીની ઘટના સામે આવી છે. એક કન્સ્ટ્રક્શન કંપનીના એન્જિનિયર કારને પાર્ક કરીને હાઈવે પર આવેલી હોટેલ પર ચા-પાણી પીવા માટે ગયા હતા. ચા પીને માત્ર 10 જ મિનિટના ટૂંકા સમયમાં તેઓ પરત ફર્યા ત્યારે કારનો કાચ તૂટેલી હાલતમાં હતો અને અંદર મૂકેલી રૂ.35 લાખની માતબર રોકડ ભરેલી બેગ ગાયબ થઈ ગઈ હતી.

કર્મચારીઓના પગાર માટે લાવ્યા હતા રોકડ

દિવાળીનો તહેવાર નજીક આવી રહ્યો હોવાથી કંપનીના કર્મચારીઓને પગાર ચૂકવવા તથા સપ્લાયરોના બાકી પેમેન્ટ પતાવવા માટે બેંકમાંથી રૂ.35 લાખની રોકડ ઉપાડીને કારમાં રાખવામાં આવી હતી. એન્જિનિયર કાર લોક કરીને ચા પીવા ગયા હતા, પરંતુ તસ્કરો પહેલેથી જ રેકી કરીને કારનો પીછો કરી રહ્યા હોવાની આશંકા સેવાઈ રહી છે.

હેલ્મેટ પહેરીને આવેલા તસ્કરો રોકડ લઈ ફરાર

આ સમગ્ર હાઈ-પ્રોફાઈલ ચોરીની ઘટના નજીકમાં લાગેલા સીસીટીવી (CCTV) કેમેરામાં કેદ થઈ ગઈ છે. સીસીટીવી ફૂટેજમાં સ્પષ્ટ દેખાય છે કે હેલ્મેટ પહેરીને આવેલા અજાણ્યા તસ્કરોએ ક્ષણભરમાં જ કારનો કાચ તોડી નાખ્યો હતો અને સીટ પર પડેલી રોકડ ભરેલી બેગ ચોરીને બાઈક પર પલાયન થઈ ગયા હતા. સમગ્ર ઘટના અંગે જાણ થતાં જ વડોદરા તાલુકા પોલીસનો કાફલો સ્થળ પર દોડી આવ્યો હતો. પોલીસે CCTVના આધારે તસ્કરોનું સગડ મેળવીને તેમને ઝડપી પાડવા માટે રાજ્યભરમાં નાકાબંધી અને સઘન તપાસના ચક્રો ગતિમાન કર્યા છે.

ગુજરાતના વધુ સમાચાર વાંચવા માટે ક્લિક કરો