બાળકોના મુખ પરનું સ્મિત અને તેમની નિર્દોષ ખુશી કોઈપણ ઉત્સવની સુંદરતામાં ચાર ચાંદ લગાવી દે છે. કહેવાય છે કે બાળકોમાં ઈશ્વરનો વાસ હોય છે અને તેમના સર્વાંગી વિકાસ માટે કરવામાં આવતો દરેક પ્રયાસ સમાજના ઉજ્જવળ ભવિષ્યનું નિર્માણ કરે છે. ત્યારે નવરાત્રિના પાવન પર્વ નિમિત્તે મીરજાપર ખાતે કપિરાજ બાળ મંડળ દ્વારા બાળકો માટે ધાર્મિક પ્રવાસનું આયોજન કરી ઉત્સવની ઉજવણીને યાદગાર બનાવવામાં આવી હતી. ગુજરાતભરમાં હાલ આદ્યશક્તિ મા જગદંબાની આરાધનાના પર્વ નવરાત્રિની ભક્તિભાવપૂર્વક ઉજવણી થઈ રહી છે. માતાજીની ઉપાસના, ગરબા અને ધાર્મિક કાર્યક્રમો વચ્ચે મીરજાપરના કપિરાજ મંદિર સાથે જોડાયેલા કપિરાજ બાળ મંડળે બાળકોમાં ધાર્મિક સંસ્કારોનું સિંચન થાય અને તેમને આનંદ સાથે કંઈક નવું શીખવા મળે તેવા ઉમદા હેતુથી આ વિશેષ આયોજન કર્યું હતું. પ્રવાસ અંતર્ગત ભુજ તાલુકામાં સુપર નજીક આવેલા નાગથળા ધાર્મિક સ્થળે બાળકોને લઈ જવામાં આવ્યા હતા. અહીં બાળકોએ ધાર્મિક સ્થળની મુલાકાત લઈ તેના મહત્ત્વ વિશે જાણકારી મેળવી હતી. પ્રવાસ દરમિયાન બાળકોને વિવિધ ધાર્મિક પરંપરાઓ અને આસ્થાનાં મહત્ત્વથી પરિચિત કરાવવામાં આવ્યાં હતાં, જેથી નાનપણથી જ તેમનામાં સંસ્કાર, સંસ્કૃતિ અને ધર્મ પ્રત્યે સમજણ વિકસે. આ પ્રવાસ માત્ર ધાર્મિક મુલાકાત પૂરતો સીમિત રહ્યો નહોતો, પરંતુ બાળકોના વ્યક્તિત્વ વિકાસને પણ પ્રાધાન્ય આપવામાં આવ્યું હતું. બાળકોમાં રહેલી સુષુપ્ત પ્રતિભા બહાર આવે, તેઓ આત્મવિશ્વાસ સાથે પોતાની આવડત રજૂ કરી શકે અને એકબીજા સાથે હળીમળીને રહેતાં શીખે તે માટે વિવિધ પ્રવૃત્તિઓ અને પર્ફોર્મન્સનું આયોજન કરવામાં આવ્યું હતું. આવી પ્રવૃત્તિઓથી બાળકોને આનંદની સાથે પોતાની ક્ષમતા પ્રદર્શિત કરવાની તક પણ મળી હતી. આ આયોજનની વિશેષતા એ રહી કે કપિરાજ બાળ મંડળ દ્વારા બાળકો માટે અલ્પાહારની વ્યવસ્થા કરવામાં આવી હતી અને પ્રવાસ તથા અલ્પાહારનો કોઈ ખર્ચ બાળકો પાસેથી લેવામાં આવ્યો નહોતો. સમગ્ર વ્યવસ્થા મીરજાપરનાં નિવૃત્ત શિક્ષિકા પ્રફુલાબેન દ્વારા કરવામાં આવી હતી. નવરાત્રિના પ્રથમ નોરતે યોજાયેલો આ પ્રવાસ બાળકો માટે મનોરંજનની સાથે ધાર્મિક જ્ઞાન, સંસ્કાર અને વ્યક્તિત્વ વિકાસનું માધ્યમ બન્યો હતો. કપિરાજ બાળ મંડળની આ પહેલે ધાર્મિક ઉત્સવને બાળપ્રતિભા અને સંસ્કાર ઘડતરના ઉમદા પ્રયાસ સાથે જોડીને સમાજ સમક્ષ પ્રેરણાદાયી ઉદાહરણ પૂરું પાડ્યું હતું.