દિલ્હીથી ચેન્નાઈ જઈ રહેલી ઇન્ડિગોની ફ્લાઇટમાં એક મુસાફરની પાવર બેંકમાં ઉડાન દરમિયાન અચાનક આગ લાગતાં અફરાતફરી મચી ગઈ હતી. આ ઘટનાનો વીડિયો પણ સામે આવ્યો છે, જેમાં મુસાફરો આગ ઓલવવાનો પ્રયાસ કરતા જોવા મળે છે. પરિસ્થિતિને ધ્યાનમાં રાખીને ફ્લાઇટનું હૈદરાબાદના રાજીવ ગાંધી ઇન્ટરનેશનલ એરપોર્ટ પર ઇમરજન્સી લેન્ડિંગ કરાવવામાં આવ્યું હતું. ઘટના બાદ મળેલી માહિતી મુજબ, તમામ મુસાફરો અને ક્રૂ મેમ્બર્સ સુરક્ષિત છે.

મળતી માહિતી મુજબ, ઇન્ડિગોની ફ્લાઇટ 6E-6115 દિલ્હીથી ચેન્નાઈ જઈ રહી હતી. ઉડાન દરમિયાન એક મુસાફરની પાવર બેંકમાંથી ધુમાડો નીકળતો જોવા મળ્યો હતો. કેબિન ક્રૂએ તરત જ પરિસ્થિતિને કાબૂમાં લીધી હતી. આગ ઓલવવા માટે અગ્નિશામક સાધનોનો ઉપયોગ કરવામાં આવ્યો હતો.

ઇન્ડિગોએ પોતાના નિવેદનમાં જણાવ્યું હતું કે, “11 ઓક્ટોબર 2026ના રોજ સંચાલિત ફ્લાઇટ 6E-6115ને એક મુસાફરના અંગત ઇલેક્ટ્રોનિક ઉપકરણમાંથી ધુમાડો નીકળતો હોવાની જાણ થતાં હૈદરાબાદ તરફ વાળવામાં આવી હતી. ફ્લાઇટને રાજીવ ગાંધી ઇન્ટરનેશનલ એરપોર્ટ પર સુરક્ષિત રીતે ઉતારવામાં આવી હતી. તમામ મુસાફરોને સુરક્ષિત રીતે બહાર કાઢવામાં આવ્યા હતા. મુસાફરોને તેમના ગંતવ્ય સ્થાને પહોંચાડવા માટે ચેન્નાઈ જવા અન્ય વિમાનની વ્યવસ્થા કરવામાં આવી છે.”

<a href="

=” target=”_blank”>

=

મુસાફરોની સુરક્ષાને લઈને એરલાઇને શું કહ્યું?

એરલાઇને જણાવ્યું કે મુસાફરોની સુરક્ષા તેની પ્રાથમિકતા છે. આવી ઘટનાઓમાં તમામ સુરક્ષા નિયમોનું કડક પાલન કરવામાં આવે છે. કેબિન ક્રૂએ અગ્નિશામક સાધનોનો ઉપયોગ કરીને આગ ઓલવી હતી.

ઘટનાનો ચોક્કસ સમય અને સ્થળ હજુ સુધી નક્કી થઈ શક્યાં નથી. આ મામલે અધિકારીઓએ તપાસ શરૂ કરી છે. પાવર બેંકમાં આગ લાગવાનું કારણ શું હતું અને તે કઈ કંપનીની હતી, તેની પણ તપાસ કરવામાં આવી રહી છે.

તપાસમાં એ પણ જાણવાનો પ્રયાસ થઈ રહ્યો છે કે ઉપકરણમાં કોઈ ટેકનિકલ ખામી હતી કે બેટરીને લગતી કોઈ સમસ્યા હતી.

છેલ્લાં કેટલાંક વર્ષોમાં લિથિયમ-આયન બેટરીથી ઊભા થતા સુરક્ષાના જોખમોને લઈને ઉડ્ડયન ક્ષેત્રમાં સતત સાવચેતી રાખવામાં આવી રહી છે. પાવર બેંક, મોબાઇલ ફોન અને અન્ય ઇલેક્ટ્રોનિક ઉપકરણોમાં વપરાતી બેટરી વધુ પડતી ગરમ થાય અથવા તેમાં ખામી સર્જાય તો આગ લાગી શકે છે.