અમેરિકી રાષ્ટ્રપતિ ડોનાલ્ડ ટ્રમ્પે જણાવ્યું છે કે રશિયા અને યુક્રેન ઊર્જા મથકો પરના હુમલા રોકવા માટે સંમત થઈ ગયા છે. તેમણે રવિવારે ટ્રુથ સોશિયલ પર પોસ્ટ કરીને કહ્યું કે યુદ્ધવિરામ તાત્કાલિક અસરથી લાગુ થશે અને બંને દેશોએ તેનું પાલન કરવું જોઈએ. જોકે, ટ્રમ્પે યુદ્ધવિરામ કેટલા સમય સુધી અમલમાં રહેશે તે જણાવ્યું નથી. રશિયા અને યુક્રેન તરફથી આ સમજૂતીની સત્તાવાર પુષ્ટિ અને તેની શરતો અંગેની માહિતી પણ સામે આવી નથી. રશિયાની તેલ રિફાઇનરીઓ પરના હુમલાથી ટ્રમ્પ નારાજ ટ્રમ્પ રશિયાની તેલ રિફાઇનરીઓ પર યુક્રેનના હુમલાઓને લઈને નારાજગી વ્યક્ત કરી ચૂક્યા છે. તેમણે શનિવારે આ હુમલાઓની ટીકા કરતાં કહ્યું કે આ હુમલાઓથી દુનિયામાં ઇંધણની સમસ્યા વધી શકે છે. હકીકતમાં, યુક્રેન રશિયાની તેલ સંબંધિત સુવિધાઓને નિશાન બનાવી રહ્યું છે. તેનાથી રશિયાની તેલથી થતી આવક અને તેની સેનાને ઇંધણ પહોંચાડવાની વ્યવસ્થાને નુકસાન થયું છે. રશિયાએ ફેબ્રુઆરી 2022માં યુક્રેન પર મોટા પાયે હુમલો શરૂ કર્યો હતો. ત્યારથી બંને દેશો વચ્ચે યુદ્ધ ચાલુ છે. ઝેલેન્સ્કીએ કહ્યું હતું- રશિયા હુમલા રોકે તો અમે પણ હુમલો બંધ કરીશું યુક્રેનના રાષ્ટ્રપતિ વોલોદિમિર ઝેલેન્સ્કીએ કહ્યું હતું કે જો રશિયા યુક્રેનના ઊર્જા મથકો પરના હુમલા રોકી દે, તો યુક્રેન પણ રશિયન તેલ રિફાઇનરીઓ પરના હુમલા બંધ કરવા તૈયાર થશે. તેમણે રવિવારે સોશિયલ મીડિયા પ્લેટફોર્મ X પર પોસ્ટ કરીને કહ્યું હતું કે તણાવ ઘટાડવા માટે બંને દેશોએ એકસાથે પગલાં ભરવા પડશે અને આ માટે મજબૂત સુરક્ષા ગેરંટી પણ જરૂરી છે. ઝેલેન્સ્કીએ ચૂંટણી યોજવા માટે 2 મહિનાના યુદ્ધવિરામની માંગ કરી ઝેલેન્સ્કીએ કહ્યું છે કે જો ટ્રમ્પ અને રશિયાના રાષ્ટ્રપતિ પુતિન યુક્રેનમાં ચૂંટણી ઈચ્છે છે, તો રશિયાએ 60 દિવસ માટે યુદ્ધ રોકવું પડશે. ઝેલેન્સ્કીએ કહ્યું કે આ દરમિયાન સંપૂર્ણ યુદ્ધવિરામ લાગુ થાય તો યુક્રેન ચૂંટણી યોજવા માટે તૈયાર છે. 11 ઑક્ટોબરે ABC ન્યૂઝને આપેલા ઇન્ટરવ્યૂમાં ઝેલેન્સ્કીએ કહ્યું કે દેશના આગામી નેતા કોણ હશે, તેનો નિર્ણય યુક્રેનની જનતા કરશે. તેમણે કહ્યું કે યુક્રેનમાં માર્શલ લૉ લાગુ હોવાથી હાલમાં ચૂંટણી યોજી શકાતી નથી. રશિયાના હુમલા બાદ દેશમાં માર્શલ લૉ લાગુ કરવામાં આવ્યો હતો. ઝેલેન્સ્કી બોલ્યા- પુતિનને રોકવું વધુ મુશ્કેલ ઝેલેન્સ્કીએ કહ્યું કે કેટલાક નેતાઓ યુદ્ધ ચાલુ રહેવા માટે તેમને જવાબદાર ઠેરવી રહ્યા છે, કારણ કે તેઓ પુતિનને રોકવાનો રસ્તો શોધી શકતા નથી. તેમણે કહ્યું કે અન્ય લોકો પર દબાણ લાવવાની સરખામણીએ પુતિનને રોકવું વધુ મુશ્કેલ છે. અમેરિકામાં ઈંધણના વધતા ભાવ માટે યુક્રેનના હુમલાઓને જવાબદાર ઠેરવનારા ટ્રમ્પના દાવાને પણ ઝેલેન્સ્કીએ ફગાવી દીધો. તેમણે કહ્યું કે ભાવ વધવાનું કારણ મધ્ય પૂર્વમાં ચાલી રહેલું યુદ્ધ અને હોર્મુઝ સ્ટ્રેટની નાકાબંધી છે. ઝેલેન્સ્કીએ આશા વ્યક્ત કરી કે અમેરિકા, યુરોપ અને યુક્રેન મળીને રશિયાને રોકવાના પ્રયાસો ચાલુ રાખશે. તેમણે કહ્યું કે યુક્રેનને અમેરિકાની મદદની આશા છે, પરંતુ તે પોતાની આઝાદી અને સ્વતંત્રતાની રક્ષા પણ કરતું રહેશે.