અમેરિકાના રાષ્ટ્રપતિ ડોનાલ્ડ ટ્રમ્પે રશિયા પાસેથી ડીઝલ ખરીદવાના નિર્ણયનો બચાવ કર્યો છે. તેમણે કહ્યું કે આ સોદો અમેરિકાના હિતમાં છે. ટ્રમ્પે દાવો કર્યો કે યુરોપિયન સંઘ (EU)એ પણ રશિયા પાસેથી ઊર્જા ખરીદવા માટે 250 અબજ ડૉલર ખર્ચ્યા છે, પરંતુ અમેરિકન મીડિયા આ મુદ્દાની અવગણના કરી રહ્યું છે. ટ્રમ્પે સોમવારે પોતાના સોશિયલ મીડિયા પ્લેટફોર્મ ટ્રુથ સોશિયલ પર લખ્યું કે EUએ ઊર્જા માટે રશિયાને 250 અબજ ડૉલર આપ્યા, પરંતુ ફેક ન્યૂઝ મીડિયા આ સમાચાર પર વાત કરવા માંગતું નથી. તેમણે કહ્યું કે તેમણે હંમેશાં અમેરિકન લોકોના હિતમાં નિર્ણયો લીધા છે અને તેમની નીતિ ‘અમેરિકા ફર્સ્ટ’ છે. રશિયા અમેરિકાને લાખો ટન ડીઝલ મોકલશે ટ્રમ્પે શુક્રવારે કહ્યું હતું કે રશિયા તાત્કાલિક 3 લાખ ટનથી વધુ ડીઝલ અમેરિકા મોકલશે. ત્યારબાદ નવેમ્બરમાં 5 લાખ ટન અને પછી 10 લાખ ટન ડીઝલ મોકલવાની વાત કહેવામાં આવી હતી. ટ્રમ્પના જણાવ્યા અનુસાર, રશિયાની રિફાઇનરીઓની સ્થિતિને આધારે થોડા સમય બાદ વધુ 30 લાખ ટન ડીઝલ મોકલવામાં આવી શકે છે. ટ્રમ્પે રશિયાના રાષ્ટ્રપતિ વ્લાદિમીર પુતિનનો આ કરાર માટે આભાર માન્યો હતો. તેમણે તેને મોટો સોદો ગણાવતા કહ્યું હતું કે અમેરિકાને મોટી માત્રામાં ડીઝલ મળશે. પુતિને એમ પણ કહ્યું કે રશિયા અમેરિકા અને દુનિયાના અન્ય બજારોને તેલ અને પેટ્રોલિયમ ઉત્પાદનો પૂરા પાડવા માટે તૈયાર છે. તેમના જણાવ્યા મુજબ, તેનાથી વૈશ્વિક અર્થતંત્રને ફાયદો થશે. EUએ 826 રશિયન કંપનીઓ પર પ્રતિબંધો લગાવ્યા ટ્રમ્પના રશિયા પાસેથી ડીઝલ ખરીદવાના નિર્ણયનો બચાવ કરવામાં આવી રહ્યો છે ત્યારે યુરોપિયન સંઘે રશિયા પર નવા પ્રતિબંધો લગાવ્યા છે. યુરોપિયન કાઉન્સિલ મુજબ, નવા પ્રતિબંધોમાં 1,569 લોકો અને સંસ્થાઓને સામેલ કરવામાં આવ્યા છે. આમાં 826 રશિયન કંપનીઓ અને તે કંપનીઓના મુખ્ય કાર્યકારી અધિકારી તરીકે કામ કરતા 743 લોકોનો સમાવેશ થાય છે. આ પ્રતિબંધોનો હેતુ રશિયાના સૈન્ય ઉદ્યોગને સામાન અને સેવાઓ પૂરી પાડતી કંપનીઓ પર દબાણ વધારવાનો છે. યુરોપિયન કાઉન્સિલ અનુસાર, આ કંપનીઓનું વાર્ષિક ટર્નઓવર ઓછામાં ઓછું 20 અબજ યુરો છે અને તેમાં 2.5 લાખથી વધુ લોકો કામ કરે છે. ઝેલેન્સ્કીએ કહ્યું- રશિયાને યુદ્ધ માટે વધુ નાણાં મળશે યુક્રેનના રાષ્ટ્રપતિ વોલોદિમિર ઝેલેન્સ્કીએ સોમવારે EUના નવા પ્રતિબંધોનું સ્વાગત કર્યું, પરંતુ રશિયા પાસેથી ડીઝલ ખરીદવાના અમેરિકાના નિર્ણયની ટીકા કરી. તેમનું કહેવું છે કે ઊર્જા વેચીને રશિયાની આવક વધશે અને તે આ નાણાંનો ઉપયોગ યુદ્ધ ચાલુ રાખવા માટે કરી શકે છે. ઝેલેન્સ્કીએ દાવો કર્યો કે અમેરિકાની તરફથી ઊર્જા ઠેકાણાઓ પર હુમલા રોકવા માટે યુદ્ધવિરામની જાહેરાત કરવામાં આવી તેના બીજા જ દિવસે રશિયાએ યુક્રેનની 6 ઊર્જા સુવિધાઓ પર હુમલો કર્યો. તેમણે કહ્યું કે આ હુમલાઓમાં દેશભરમાં 33 લોકો ઘાયલ થયા. ટ્રમ્પે રવિવારે રશિયા અને યુક્રેનમાં એનર્જી સીઝફાયર અંગે માહિતી આપી ટ્રમ્પે રવિવારે જણાવ્યું હતું કે રશિયા અને યુક્રેન ઊર્જા ઠેકાણાઓ પર હુમલા રોકવા માટે સંમત થઈ ગયા છે. તેમણે ટ્રુથ સોશિયલ પર પોસ્ટ કરીને કહ્યું કે સીઝફાયર તાત્કાલિક અસરથી લાગુ થશે અને બંને દેશોએ તેનું પાલન કરવું જોઈએ.