વલસાડમાં નવરાત્રિ દરમિયાન યુવતીઓની સુરક્ષા માટે પોલીસની સી ટીમ સક્રિય બની છે. મહિલા પોલીસકર્મીઓ ચણિયાચોળી પહેરીને ગરબામાં ભળી જઈ રોડ રોમિયો પર નજર રાખી રહી છે. શહેરના રેલવે યાર્ડ સહિત શેરી અને કોમર્શિયલ ગરબા ગ્રાઉન્ડમાં સી ટીમ દ્વારા આકસ્મિક ચેકિંગ હાથ ધરાયું છે. યુવતીઓની છેડતી કે હેરાનગતિ ન થાય તે માટે આ પગલાં લેવાયા છે. સાદા વેશમાં મહિલા પોલીસકર્મીઓ સામાન્ય ખેલૈયાઓ વચ્ચે રહીને શંકાસ્પદ હિલચાલ પર નજર રાખે છે. આ પદ્ધતિથી અસામાજિક તત્ત્વોને ઓળખવામાં મદદ મળે છે. પોલીસનો હેતુ યુવતીઓ નિર્ભય બની ગરબા માણી શકે તેવો સુરક્ષિત માહોલ બનાવવાનો છે. છેડતી કરતા તત્ત્વો પર અંકુશ લાવવાનો પ્રયાસ થઈ રહ્યો છે.