મોરબીમાં 16 શ્રાદ્ધના પર્વ નિમિત્તે અનસ્ટોપેબલ વોરીયર્સ ગ્રુપે વિવિધ સેવાકાર્યો કર્યા હતા. ગ્રુપે જરૂરિયાતમંદોને ખીર-પુરી, ચપ્પલ અને વૃદ્ધોને શીરો ખવડાવી ખુશી વહેંચી હતી. આ પ્રવૃત્તિઓ અંતર્ગત મેઘપરની ઉત્તર બુનિયાદી વિદ્યાલયના વિદ્યાર્થીઓને ખીર, પુરી અને ભાજીનો નાસ્તો કરાવવામાં આવ્યો. વિદ્યાલયની તમામ દીકરીઓને ચપ્પલ પણ આપવામાં આવ્યા. આ ઉપરાંત, માળિયાના સંગાથ વૃદ્ધાશ્રમના વડીલોને શીરો ખવડાવી તેમની સાથે સમય વિતાવ્યો. વડીલો પ્રત્યે આદર અને હૂંફ વ્યક્ત કરી ખુશીની પળો વહેંચવામાં આવી. મોરબી શહેરના નવલખી ફાટક, પરશુરામ ધામ, કામધેનું સર્કલ, દલવાડી સર્કલ, લીલાપર કેનાલ રોડ અને પીએમ આવાસ જેવા વિસ્તારોમાં જરૂરિયાતમંદ લોકોને નાસ્તો વહેંચવામાં આવ્યો હતો. અનસ્ટોપેબલ વોરીયર્સ ગ્રુપના પ્રમુખ હેતલબેન પટેલ સહિત ગ્રુપની બહેનોએ આ સેવાકાર્યને સફળ બનાવ્યું.