દમણમાં લોન અપાવવાના બહાને છેતરપિંડી કરનાર વાપીના 26 વર્ષીય શખ્સ સેમસન સિંહ ઉર્ફે શુભમ મનોજ સિંહને દમણ પોલીસે નવી મુંબઈથી પકડ્યો છે. તેણે બે પીડિતોને 2.18 લાખ રૂપિયાથી વધુનું નુકસાન પહોંચાડ્યું. પોલીસે જણાવ્યું કે, 15 સપ્ટેમ્બર, 2026ના રોજ બ્રિજેશ મૌર્યએ ફરિયાદ નોંધાવી હતી. આરોપીએ તેમને 1.50 લાખની લોન અપાવવાના બહાને 41,269 રૂપિયા પોતાની પાસે ટ્રાન્સફર કરાવી લીધા હતા. આ ઉપરાંત, ફરિયાદીના મિત્ર લવકુશ રામશિયા પટેલને પીએફની રકમ ઉપાડવામાં મદદ કરવાનું કહી તેમના બજાજ ફાઇનાન્સ કાર્ડનો દુરુપયોગ કર્યો. આ કાર્ડથી 98,904 અને 78,543 રૂપિયાના બે મોંઘા મોબાઈલ ફોન ખરીદ્યા હતા. દમણ પોલીસે ટેક્નિકલ સર્વેલન્સથી આરોપીને નવી મુંબઈથી પકડ્યો. પોલીસે તેના ચાર દિવસના રિમાન્ડ મેળવી તપાસ શરૂ કરી છે. આરોપીએ દમણ, મોરાઈ અને સેલવાસમાં પણ છેતરપિંડીની કબૂલાત કરી છે. પોલીસે નાગરિકોને અજાણ્યા વ્યક્તિઓ સાથે OTP, બેન્કિંગ અને કાર્ડની વિગતો શેર ન કરવા તથા અધિકૃત સંસ્થાઓ પાસેથી જ લોન લેવા અપીલ કરી છે.