અમદાવાદના પીપલજ પાસે ગટરમાં બાળકી ખાબકવાના બનાવમાં ચોથા દિવસે પણ સઘન શોધખોળ ચાલુ રહી છે. ફાયર વિભાગ, ડ્રેનેજ વિભાગ અને NHAIની ટીમ દ્વારા સતત 24 કલાક રેસ્ક્યુ કામગીરી હાથ ધરવામાં આવી છે. તંત્ર દ્વારા નદીના પટ પર પણ સઘન શોધખોળ કરવા છતાં હજુ સુધી આ બાળકીનો કોઈ પત્તો મળ્યો નથી.

ચોથા દિવસે પણ શોધખોળ

અમદાવાદ શહેરના પીપલજ વિસ્તાર પાસે બનેલી આ ગંભીર ઘટનામાં ગટરમાં ગરકાવ થઈ ગયેલી બાળકીને બહાર કાઢવા માટેનું અભિયાન ચોથા દિવસે પણ પૂરજોશમાં ચાલુ રાખવામાં આવ્યું છે. સ્થાનિક સ્તરે બનેલી આ દુર્ઘટના બાદ વહીવટી તંત્ર દ્વારા તાત્કાલિક અસરથી બચાવ કામગીરી શરૂ કરવામાં આવી હતી. જેમાં ફાયર વિભાગ, ડ્રેનેજ વિભાગ તેમજ NHAIની અલગ અલગ ટીમો સક્રિયપણે જોડાઈ છે.

ગટર લાઇનના દરેક સંભવિત હિસ્સામાં તપાસ

તમામ સંબંધિત ટીમો દ્વારા દિવસ-રાત જોયા વિના સતત 24 કલાક રેસ્ક્યુ ઓપરેશન ચલાવવામાં આવી રહ્યું છે. ચોથા દિવસ સુધી પહોંચેલી આ શોધખોળ દરમિયાન ગટર લાઇનના દરેક સંભવિત હિસ્સામાં તપાસ કરવામાં આવી રહી છે. ગટરના જોખમી પ્રવાહ વચ્ચે બાળકીની શોધ માટે બચાવ ટુકડીઓ સતત પ્રયાસરત છે. ત્રણ મહત્વપૂર્ણ વિભાગોના સંકલન સાથે સમગ્ર વિસ્તારમાં ચલાવવામાં આવી રહેલી આ તપાસ દરમિયાન ટીમો દ્વારા ગટરના તમામ પોઇન્ટ પર નજર રાખવામાં આવી છે.

5 મેનહોલને ખાસ ખોદીને તપાસ 

શોધખોળની આ કામગીરીને વધુ વિસ્તૃત બનાવવા માટે NHAI દ્વારા અગાઉ બંધ કરી દેવાયેલા 5 મેનહોલને ખાસ ખોદીને તપાસ હાથ ધરવામાં આવી હતી. ગટર લાઇનમાં કોઈ જગ્યાએ બાળકી અટવાઈ ગઈ છે કે કેમ તે જાણવા માટે આ બંધ મેનહોલ ખોદવાનો મહત્વનો નિર્ણય લેવામાં આવ્યો હતો. બંધ હાલતમાં રહેલા તમામ 5 મેનહોલ ખોદીને અંદર ઉતરીને તેમજ તપાસ સાધનોની મદદથી ઊંડાણપૂર્વક ચકાસણી કરવામાં આવી હતી. 

નદીના પટ પર પણ મોટા પાયે શોધખોળ 

આ ઉપરાંત, ગટરનું પાણી જ્યાં આગળ વધે છે તે દિશાને ધ્યાને રાખીને નદીના પટ પર પણ મોટા પાયે શોધખોળ હાથ ધરવામાં આવી છે. બચાવ ટીમો દ્વારા નદીના પટના વિશાળ વિસ્તારમાં ચાંપતી નજર રાખીને બાળકીને શોધવાના તમામ શક્ય પ્રયાસો કરવામાં આવ્યા હતા. ચોથા દિવસે પણ નદીના કાંઠા અને પટના ખુલ્લા વિસ્તારોમાં તપાસ લંબાવવામાં આવી હતી.

બાળકીનો હજુ સુધી કોઈ પત્તો લાગ્યો નથી

આમ છતાં, આટલા મોટા પાયે સતત ચાલી રહેલા રેસ્ક્યુ ઓપરેશન બાદ પણ બાળકીનો હજુ સુધી કોઈ પત્તો લાગ્યો નથી. ફાયર વિભાગ, ડ્રેનેજ તંત્ર અને NHAI દ્વારા કરવામાં આવેલી સંયુક્ત કવાયત તથા 24 કલાકથી ચાલતા બચાવ કાર્ય છતાં બાળકી લાપતા રહેતાં પરિસ્થિતિ ગંભીર બની છે. બંધ મેનહોલ ખોદવા અને નદીના પટ ખૂંદવા છતાં પણ હજુ સુધી કોઈ સફળતા મળી શકી નથી. ચાર-ચાર દિવસથી ચાલી રહેલી આ અવિરત શોધખોળ વચ્ચે બાળકીની કોઈ ભાળ ન મળતાં તંત્રની શોધ ચાલુ છે.  

આ પણ વાંચો  :    Delhi: “તમને સિસ્ટમ પર શંકા છે કે પરિણામો પર?” ચૂંટણી પંચના સમર્થનમાં 124 પૂર્વ IAS-IFS અધિકારીઓનો ખુલ્લો પત્ર