સુરત શહેરના સચિન વિસ્તારમાં કરોડતુલ્ય જમીન પચાવી પાડવાના એક મોટો કૌભાંડ સામે આવ્યો છે. જેમાં સગા સંબંધો અને વિશ્વાસનો ખૂન કરીને 21 વીઘા જમીન પચાવી પાડવા માટે બોગસ દસ્તાવેજો ઊભા કરવામાં આવ્યા હતા. મળતી વિગતો મુજબ, આરોપીઓએ પોતાની જ બહેનોની અજાણતા અને મંજૂરી વગર તેમની ખોટી સહીઓ કરી લીધી હતી. આ કૌભાંડ સામે આવ્યા બાદ વિસ્તારમાં અરેરાટી વ્યાપી ગઈ છે અને સમગ્ર મામલો હવે કાનૂની સકંજામાં આવી ગયો છે.

બનાવટી કરારથી જમીન પચાવવાનો આરોપ

આરોપીઓએ કાયદાની આંખમાં ધૂળ નાખીને 21 વીઘા જમીનના બોગસ અને બનાવટી કરાર તૈયાર કર્યા હતા. આ બનાવટી કાગળોના આધારે જમીનનો માલિકી હક પચાવી પાડવાનો કાળો ખેલ રચવામાં આવ્યો હતો. ઘટનાની જાણ થતાં જ પીડિત પક્ષ દ્વારા સચિન પોલીસ સ્ટેશનમાં વિધિવત ફરિયાદ નોંધાવવામાં આવી હતી. ગુનાની ગંભીરતાને ધ્યાનમાં રાખીને કેસની આગળની તપાસ સુરત ક્રાઈમ બ્રાન્ચની ઇકો સેલ (Economic Offences Wing)ને સોંપવામાં આવી હતી.

ઇકો સેલ પોલીસે 3 આરોપીઓને ઝડપ્યા

તપાસનો દોર સંભાળતા જ ઇકો સેલની ટીમે ટેકનિકલ એનાલિસિસ અને દસ્તાવેજોની ચકાસણી હાથ ધરી હતી. તપાસ દરમિયાન કૌભાંડમાં સંકળાયેલા 3 મુખ્ય આરોપીઓ—જસવંતસિંહ તેમજ 2 વિક્રમસિંહની અટકાયત કરવામાં આવી છે. પોલીસ દ્વારા તમામ દસ્તાવેજો જપ્ત કરી એ ફોરેન્સિક ચકાસણી માટે મોકલવાની તજવીજ હાથ ધરાઈ છે. ઇકો સેલની આ કડક કાર્યવાહીથી જમીન પચાવી પાડતા ભૂમાફિયાઓમાં ફાફડાટ વ્યાપી ગયો છે.

આ પણ વાંચો : Ahmedabad News : તમારી આસપાસની હવા કેટલી શુદ્ધ છે? આ વિસ્તારોમાં શ્વાસ લેવો બની ગયો છે મોટો ખતરો!