વડોદરા શહેરમાં પ્રદૂષણમુક્ત જાહેર પરિવહનને પ્રોત્સાહન આપવા માટે પીએમ ઇ-બસ સેવા હેઠળ વધુ 30 ઇલેક્ટ્રિક બસોનું લોકાર્પણ કરવામાં આવ્યું છે. અગાઉ શહેરમાં 50 બસો કાર્યરત હતી, જેમાં આ નવી બસો ઉમેરાતાં હવે કુલ 80 ઇ-બસો સેવામાં જોડાઈ છે. આ નવીન સેવાથી શહેરના વિવિધ વિસ્તારોમાં દૈનિક મુસાફરી કરતા નાગરિકોને મોટી સુવિધા મળશે.
વડોદરામાં પ્રદૂષણમુક્ત જાહેર પરિવહનને પ્રોત્સાહન
પીએમ ઇ-બસ સેવા યોજના અંતર્ગત વડોદરા શહેરમાં તબક્કાવાર પરિવહન સેવાનો વ્યાપ વધારવાનું વિશેષ આયોજન કરવામાં આવ્યું છે. આ યોજનાના ફેઝ-1 અને ફેઝ-2 હેઠળ સમગ્ર શહેરમાં કુલ 250 ઇલેક્ટ્રિક બસો દોડાવવાનું લક્ષ્ય રાખવામાં આવ્યું છે. આ નવી બસો શરૂ થવાથી શહેરના ઉત્તર, દક્ષિણ, પૂર્વ અને પશ્ચિમ એમ ચારેય મુખ્ય ઝોન વચ્ચે પરિવહન નેટવર્ક વધારે મજબૂત બનશે. આ સાથે શહેરની નજીક આવેલા ગ્રામ્ય વિસ્તારો તેમજ મુખ્ય ઔદ્યોગિક વસાહતોને પણ આ બસ સેવા સાથે આવરી લેવાશે. ખાસ કરીને જીઆઇડીસી, મકરપુરા, સાવલી અને પોર જેવા ઔદ્યોગિક પટ્ટાઓમાં અવરજવર કરતા શ્રમિકો અને મુસાફરોને સીધી કનેક્ટિવિટી મળશે, જ્યારે રેલવે સ્ટેશન અને એરપોર્ટ સુધી પહોંચવા માટે પણ નાગરિકોને આ બસ સેવાનો મોટો લાભ મળશે.
નાગરિકોને આ બસ સેવાનો મોટો લાભ મળશે
શહેરમાં મુસાફરી કરતા નાગરિકોની સલામતી સુનિશ્ચિત કરવા માટે તમામ ઇલેક્ટ્રિક બસોમાં સીસીટીવી મોનિટરિંગની ખાસ વ્યવસ્થા કરવામાં આવી છે. આ સુરક્ષિત વ્યવસ્થા થકી મુસાફરો નિર્ભય બનીને યાત્રા કરી શકશે અને શહેરમાં વાયુ પ્રદૂષણ ઘટાડવાના પ્રયાસોને પણ સીધું બળ મળશે. આ ઉપરાંત મુસાફરોની સગવડ વધારવા માટે વહીવટીતંત્ર દ્વારા ટૂંક સમયમાં ખાસ મોબાઇલ એપ્લિકેશન તેમજ ડિજિટલ કાર્ડની સુવિધા અમલમાં મૂકવામાં આવશે. નિયમિત યાત્રા કરતા મુસાફરો માટે સિઝનલ અને એન્યુઅલ પાસની સુવિધા પણ શરૂ કરાશે, જેનાથી લોકોને સરળ અને આધુનિક મુસાફરીનો અનુભવ પ્રાપ્ત થશે.