ભારતીય ક્રિકેટ ટીમના ન્યૂઝીલેન્ડ પ્રવાસ પહેલાં ટીમની પસંદગીને લઈને મહત્વપૂર્ણ અપડેટ સામે આવ્યું છે.ભારત અને ન્યૂઝીલેન્ડ વચ્ચે 22 ઓક્ટોબરથી T20 શ્રેણી શરૂ થવાની છે,જેના માટે ભારતીય ટીમની જાહેરાત થઈ ચૂકી છે.જોકે ત્યારબાદ રમાનારી વનડે અને ટેસ્ટ શ્રેણી માટે ભારતીય ટીમની જાહેરાત હજુ બાકી છે.મિડિયા રિપોર્ટ અનુસાર પસંદગી સમિતિ વનડે અને ટેસ્ટ ટીમની જાહેરાત ઉતાવળમાં કરવા માગતી નથી.તેનું મુખ્ય કારણ ત્રણ ખેલાડીઓની ફિટનેસ છે.ઝડપી બોલરો પ્રસિદ્ધ કૃષ્ણા અને હર્ષિત રાણા ઉપરાંત વિકેટકીપર બેટ્સમેન ઋષભ પંતની ફિટનેસ અંગેની માહિતીની રાહ જોવામાં આવી રહી છે.

3 ખેલાડીઓના કારણે ટીમની પસંદગીમાં વિલંબ

મિડિયા રિપોર્ટ અનુસાર પસંદગીકારો પ્રસિદ્ધ કૃષ્ણા,હર્ષિત રાણા અને ઋષભ પંતની ફિટનેસ રિપોર્ટ મળ્યા બાદ ટીમની પસંદગી કરવા માગે છે.હર્ષિત રાણા વનડે ટીમ માટે મહત્વપૂર્ણ ખેલાડી છે, જ્યારે ઋષભ પંત ટેસ્ટ ટીમનો મહત્વનો ભાગ છે. બીજી તરફ, પ્રસિદ્ધ કૃષ્ણા બંને ફોર્મેટમાં ભારતીય ટીમનો હિસ્સો રહ્યા છે. આ ત્રણેય ખેલાડીઓ ન્યૂઝીલેન્ડ પ્રવાસ માટે ઉપલબ્ધ રહેશે કે નહીં,તે નક્કી થયા બાદ ટીમની પસંદગી અંગે અંતિમ નિર્ણય લેવામાં આવી શકે છે.

પ્રસિદ્ધ કૃષ્ણા અને હર્ષિત રાણાની ફિટનેસ પર નજર

અહેવાલ અનુસાર,પ્રસિદ્ધ કૃષ્ણા જ્યારે BCCIના સેન્ટર ઑફ એક્સેલન્સમાં પુનર્વસન માટે પહોંચ્યા હતા,ત્યારે તેમને ફિટ થવા માટે આશરે 3 અઠવાડિયાનો સમય આપવામાં આવ્યો હતો.તેમની હાલની સ્થિતિ અંગેની માહિતી ટીમની પસંદગીમાં મહત્વપૂર્ણ બની શકે છે.બીજી તરફ સ્ટાર બોલર હર્ષિત રાણા જુલાઈથી સેન્ટર ઑફ એક્સેલન્સમાં છે.તેઓ 25 ઓક્ટોબરે એક અભ્યાસ મેચ રમવાના છે.આ મેચમાં તેમની ફિટનેસ અને મેદાન પરની સ્થિતિનું મૂલ્યાંકન થઈ શકે છે.ભારતીય ટીમના પ્રવાસના કાર્યક્રમને ધ્યાનમાં રાખીને પસંદગીકારો આ બંને ઝડપી બોલરોની ઉપલબ્ધતા અંગે સ્પષ્ટતા મેળવવા માગે છે.

ઋષભ પંતની ઈજાએ વધારી ચિંતા

વિકેટકીપર બેટ્સમેન ઋષભ પંતની ફિટનેસ પણ પસંદગી સમિતિ માટે મહત્વપૂર્ણ મુદ્દો છે.BCCIએ થોડા દિવસ પહેલાં જાણકારી આપી હતી કે ઈજાને કારણે પંત ન્યૂઝીલેન્ડ પ્રવાસ પહેલાં ઇન્ડિયા Aની શરૂઆતની 2 મેચમાં રમી શકશે નહીં.આ સ્થિતિમાં ટેસ્ટ શ્રેણી માટે પંતની ઉપલબ્ધતા અંગે નિર્ણય લેતાં પહેલાં તેમની ફિટનેસનું મૂલ્યાંકન જરૂરી બની શકે છે.ટેસ્ટ ક્રિકેટમાં પંતની ભૂમિકાને ધ્યાનમાં રાખીને પસંદગીકારો તેમની સ્થિતિ સ્પષ્ટ થાય ત્યાં સુધી રાહ જોઈ શકે છે.

ક્યારે જાહેર થશે ભારતની ટીમ?

ભારતીય ટીમ 28 ઓક્ટોબરે વનડે અને ટેસ્ટ શ્રેણી માટે રવાના થવાની છે. વનડે શ્રેણી 4 નવેમ્બરથી શરૂ થવાની હોવાથી પસંદગી સમિતિએ તે પહેલાં ટીમની જાહેરાત કરવી પડશે.ત્રણેય ખેલાડીઓની ફિટનેસ અને ન્યૂઝીલેન્ડ પ્રવાસ માટેની ઉપલબ્ધતા અંગે સ્પષ્ટ માહિતી મળ્યા બાદ પસંદગીકારોની બેઠક યોજાઈ શકે છે. ત્યારબાદ વનડે અને ટેસ્ટ ટીમની જાહેરાત થવાની શક્યતા છે.

ન્યૂઝીલેન્ડ પ્રવાસ ભારત માટે મહત્વપૂર્ણ

ભારતના ન્યૂઝીલેન્ડ પ્રવાસમાં T20 શ્રેણી બાદ વનડે અને ટેસ્ટ શ્રેણી રમાવાની છે. દરેક ફોર્મેટ માટે યોગ્ય ખેલાડીઓની પસંદગી કરવી ટીમ મેનેજમેન્ટ માટે મહત્વપૂર્ણ રહેશે.પ્રસિદ્ધ કૃષ્ણા, હર્ષિત રાણા અને ઋષભ પંતની ફિટનેસ અંગેના અંતિમ નિર્ણયની અસર ટીમના સંતુલન પર પડી શકે છે. હવે જોવાનું એ રહેશે કે ત્રણેય ખેલાડીઓ સમયસર ફિટ થઈને ટીમમાં સ્થાન મેળવી શકે છે કે નહીં.

આ પણ વાંચો – Fakhar Zamanએ એક છગ્ગાથી રચ્યો ઇતિહાસ,આ મામલે પ્રથમ ખેલાડી બન્યો