સુરત શહેરમાં નજીવા રૂપિયા કમાવા માટે લોકોના આરોગ્ય સાથે ગંભીર ચેડાં કરવાનો કિસ્સો સામે આવ્યો છે, જ્યાં પશુઓને અપાતી દવા માણસોને પધરાવવામાં આવી રહી હતી. આ સમગ્ર મામલે સુરત એસઓજી પોલીસે ગોપીપુરા વિસ્તારમાં આવેલા શાંતિનાથ મેડિકલ સ્ટોરમાં દરોડો પાડીને પશુઓને અપાતી લિવ. 52 દવા માણસોને વેચવાના રેકેટનો પર્દાફાશ કરી આરોપી સાજિદ મુલ્લાની ધરપકડ કરી છે.
શાંતિનાથ મેડિકલ સ્ટોરમાં પશુઓ માટેની દવાઓનું ગેરકાયદેસર રીતે વેચાણ
સુરત શહેરમાં માત્ર નજીવા રૂપિયા કમાઈ લેવાની લાલચમાં માનવ જિંદગી સામે ગંભીર ગુનો આચરવામાં આવી રહ્યો હોવાની ચોંકાવનારી વિગતો સામે આવી છે. સુરત એસઓજી પોલીસને ચોક્કસ બાતમી મળી હતી કે શહેરના ગોપીપુરા વિસ્તારમાં આવેલા શાંતિનાથ મેડિકલ સ્ટોરમાં પશુઓ માટેની દવાઓનું ગેરકાયદેસર રીતે વેચાણ કરવામાં આવી રહ્યું છે. આ બાતમીના આધારે પોલીસે શાંતિનાથ મેડિકલ પર તાત્કાલિક છાપો માર્યો હતો અને ત્યાં તપાસ હાથ ધરી હતી.
નિર્દોષ નાગરિકોને પશુઓની દવા વેચાતી હતી
પોલીસની તપાસ દરમિયાન સામે આવ્યું હતું કે આ મેડિકલ સ્ટોરમાંથી નિર્દોષ નાગરિકોને પશુઓ માટે નિર્ધારિત કરવામાં આવેલી લિવ. 52 દવા વેચવામાં આવી રહી હતી. પ્રાથમિક વિગતો મુજબ, માત્ર થોડા રૂપિયાનો નફો મેળવવા માટે આરોપી દ્વારા લોકોના જીવ જોખમમાં મુકાય તેવું આ ગંભીર કૃત્ય આચરવામાં આવતું હતું. પોલીસે સમગ્ર રેકેટ ઝડપી પાડીને શાંતિનાથ મેડિકલ સાથે સંકળાયેલા આરોપી સાજિદ મુલ્લાની ધરપકડ કરીને તેની સામે કાયદેસરની કડક કાર્યવાહી હાથ ધરી છે.
દવાના મોટા પાંચ લિટરના કેન લાવતો
પોલીસની પ્રાથમિક પૂછપરછ અને તપાસમાં બહાર આવેલી વિગતો અનુસાર, આરોપી સાજિદ મુલ્લા પશુઓ માટે વપરાતી દવાના મોટા પાંચ લિટરના કેન લાવતો હતો. આ પાંચ લિટરના કેનમાંથી તે નાની બોટલોમાં દવાનું રિફિલિંગ કરતો હતો. આ નાની બોટલો તૈયાર કરીને તે પોતાના મેડિકલ સ્ટોર પરથી દવા લેવા આવતા સામાન્ય માણસોને પધરાવી દેતો હતો.
આર્થિક લાભ ખાતર આ દવા ખુલ્લેઆમ માણસોને અપાતી
વાસ્તવમાં આ લિવ. 52 દવા ખાસ કરીને પશુઓને ખોરાકી તેમ જ ઝેર સામે તેમના લિવરનું રક્ષણ કરવા માટે ઉપયોગમાં લેવામાં આવતી હોય છે. પશુઓ માટે બનાવવામાં આવેલી આ વિશેષ દવા કોઈ પણ સંજોગોમાં માનવ ઉપયોગ માટે માન્ય હોતી નથી. આમ છતાં, આરોપી પોતાના આર્થિક લાભ ખાતર આ દવા ખુલ્લેઆમ માણસોને આપી રહ્યો હતો. આ દવાનો ઉપયોગ કરનારા સામાન્ય નાગરિકોને તેના પરિણામો વિશે કોઈ જાણકારી નહોતી. પોલીસે આ સમગ્ર નેટવર્ક ઝડપી લઈ આગળની તપાસ શરૂ કરી છે.
આ પણ વાંચો : Amit Shahનો હૂંકાર, 2029માં પ્રચંડ હારનો સામનો કરવા તૈયાર રહે રાહુલ