અમદાવાદ શહેરના ઉત્તર ઝોનમાં આવેલા કુબેરનગર વિસ્તારમાંથી મારામારી અને હુમલાની એક અત્યંત ચોંકાવનારી ઘટના સામે આવી છે. કુબેરનગર સ્થિત સાઈબાબા મંદિર પાસે જૂની અદાવત અને બોલાચાલીમાં પોતાના મિત્રનો બચાવ કરવા વચ્ચે પડેલા નાનુ સેવાણી નામના યુવક પર ત્રણ લોકોએ એકસંપ થઈને જાનલેવા હુમલો કરી દીધો હતો. સરેઆમ થયેલી આ મારામારીને કારણે વિસ્તારમાં થોડા સમય માટે ભારે અફરાતફરી અને સન્નાટો વ્યાપી ગયો હતો.

રિશીને ભગાડી દેવાના મુદ્દે સળગ્યો વિવાદ

મળતી પ્રાથમિક વિગતો અનુસાર, આરોપીઓ અને ફરિયાદી વચ્ચે રિશી નામના યુવકને ભગાડી દેવા કે છુપાવી દેવાના વિવાદને લઈને ઉગ્ર બોલાચાલી થઈ હતી. વિવાદ વધતાં જ આરોપી સુનીલ મુરજાની, તેના પિતા અને તેના ભાઈએ એકસંપ થઈને નાનુ સેવાણી સાથે તીવ્ર ઝપાઝપી શરૂ કરી હતી. આ દરમિયાન દૂધ માપવા માટે વપરાતા ભારે સ્ટીલના માપિયા વડે નાનુ સેવાણી પર માથાના અને શરીરના ભાગે હુમલો કરવામાં આવ્યો હોવાનો ગંભીર આક્ષેપ કરાયો છે.

એરપોર્ટ પોલીસે 3 આરોપીઓ સામે તપાસ તેજ કરી

દૂધના માપિયા વડે થયેલા આડેધડ હુમલામાં યુવક લોહીલુહાણ થઈને ઢળી પડ્યો હતો. સ્થાનિક લોકો એકઠા થઈ જતાં તેને ત્વરિત સારવાર અર્થે નજીકની હોસ્પિટલમાં ખસેડવામાં આવ્યો હતો. આ મામલે ફરિયાદી નાનુ સેવાણીની નિવેદનના આધારે એરપોર્ટ પોલીસ સ્ટેશનમાં સુનીલ મુરજાની તેમજ તેના પિતા અને ભાઈ એમ કુલ 3 લોકો વિરુદ્ધ ગુનો નોંધવામાં આવ્યો છે. એરપોર્ટ પોલીસે કાયદાકીય કલમો હેઠળ તપાસનો દોર સંભાળીને આરોપીઓની અટકાયત કરવાની પ્રક્રિયા હાથ ધરી છે.

આ પણ વાંચો : Halvadમાં ભૂમાફિયાઓ પર ત્રાટકી ખાણ-ખનિજ ટીમ, એક જ અઠવાડિયામાં બીજો મોટો દરોડો, રેતી માફિયાઓમાં ભારે ફફડાટ