ગાંધીનગર સ્થિત સચિવાલયના સ્વર્ણિમ સંકુલ-1 ના ચોથા માળે મુખ્યમંત્રી ભૂપેન્દ્ર પટેલે અચાનક સરપ્રાઇઝ વિઝિટ કરી હતી. મુખ્યમંત્રીની આ બિનઅધિકૃત અને અચાનક થયેલી મુલાકાતને પગલે સચિવાલયના વહીવટી વર્તુળોમાં ભારે ચર્ચા શરૂ થઈ ગઈ છે. સંકુલના ચોથા માળે મુખ્યમંત્રી કચેરીના વહીવટી અધિકારીઓ બેસતા હોવાથી મુખ્યમંત્રીએ સીધા જઈને ત્યાંની વ્યવસ્થા નિહાળી હતી. ટોચના વહીવટી અધિકારીઓ પણ સાથે જોડાયા
મુખ્યમંત્રી ભૂપેન્દ્ર પટેલની આ સરપ્રાઇઝ મુલાકાત દરમિયાન રાજ્યના મુખ્ય સચિવ એમ.કે. દાસ અને અધિક અગ્ર સચિવ વિક્રાંત પાંડે પણ તાત્કાલિક સ્થળ પર પહોંચી ગયા હતા. મુખ્યમંત્રીએ ચોથા માળે સ્થિત કચેરીઓમાં બેસતા તમામ વહીવટી અધિકારીઓ સાથે રૂબરૂ મુલાકાત કરીને વહીવટી પ્રક્રિયાઓ અંગે વાતચીત કરી હતી. કામગીરીની સીધી માહિતી મેળવવાનો પ્રયાસ
મુખ્યમંત્રી ભૂપેન્દ્ર પટેલ અગાઉ પણ અનેક સરકારી કચેરીઓ અને વહીવટી સ્થળોએ આ રીતે અચાનક મુલાકાત લેતા રહ્યા છે. આવી સરપ્રાઇઝ વિઝિટના માધ્યમથી સરકારી કામગીરીની વાસ્તવિક સ્થિતિ, અધિકારીઓ તથા કર્મચારીઓની હાજરી અને સચિવાલયની વહીવટી વ્યવસ્થાની સીધી માહિતી મેળવવામાં મદદ મળે છે. મુલાકાતના સત્તાવાર હેતુ અંગે ચર્ચા
ચોથા માળે મુખ્યમંત્રી તેમજ રાજ્યના ટોચના વહીવટી અધિકારીઓની હાજરીને પગલે સચિવાલયમાં વિવિધ ચર્ચાઓએ જોર પકડ્યું છે. મુલાકાત દરમિયાન કોઈ ચોક્કસ કામગીરીની સમીક્ષા કરવામાં આવી કે અધિકારીઓને ખાસ સૂચનાઓ આપવામાં આવી તે અંગે હજુ સુધી કોઈ સત્તાવાર વિગતો કે પુષ્ટિ સામે આવી નથી..