ભારતીય ક્રિકેટ કંટ્રોલ બોર્ડ (BCCI)ની સિનિયર પુરુષ પસંદગી સમિતિના ચીફ સિલેક્ટર પદને લઈને મોટો ફેરફાર જોવા મળી રહ્યો છે. પૂર્વ ભારતીય વિકેટકીપર-બેટર પાર્થિવ પટેલ આ પદ માટે અરજી કરશે તેવી ચર્ચા હતી, પરંતુ અરજી કરવાની અંતિમ તારીખ સુધી તેમણે ફોર્મ ભર્યું નથી. આ સ્થિતિમાં પૂર્વ ભારતીય સ્પિનર પ્રજ્ઞાન ઓઝા પસંદગી સમિતિના અધ્યક્ષ તરીકે ચાલુ રહે તેવી શક્યતા વધી ગઈ છે. જોકે, BCCI તરફથી આ અંગે સત્તાવાર જાહેરાત કરવામાં આવી નથી.
પાર્થિવ પટેલે કેમ ન કરી અરજી?
અજિત અગરકરનો કાર્યકાળ પૂરો થયા બાદ તેમની જગ્યાએ વેસ્ટ ઝોનમાંથી નવા સિલેક્ટરની પસંદગી કરવાની પ્રક્રિયા ચાલી રહી છે. પાર્થિવ પટેલને આ પદ માટે મજબૂત દાવેદાર માનવામાં આવતા હતા. જોકે, 14 ઓક્ટોબરે અરજી કરવાની સમયમર્યાદા પૂરી થઈ ત્યાં સુધી તેમણે અરજી કરી નહોતી હાલમાં પાર્થિવ પટેલ ગુજરાત ટાઇટન્સના કોચિંગ સ્ટાફ સાથે જોડાયેલા છે અને ક્રિકેટ કોમેન્ટ્રી પણ કરે છે. તેઓ પોતાની આ જવાબદારીઓ ચાલુ રાખે તેવી શક્યતા છે. BCCI અરજી કરવાની સમયમર્યાદા વધારે અથવા પાર્થિવ પોતાનો નિર્ણય બદલે તો સ્થિતિમાં ફેરફાર થઈ શકે છે.
પ્રજ્ઞાન ઓઝાની દાવેદારી કેમ મજબૂત?
પ્રજ્ઞાન ઓઝા હાલમાં પસંદગી સમિતિમાં સાઉથ ઝોનનું પ્રતિનિધિત્વ કરે છે અને વચગાળાના અધ્યક્ષ તરીકે જવાબદારી સંભાળી રહ્યા છે. હાલના સિલેક્ટર્સમાં તેમના નામે સૌથી વધુ ટેસ્ટ મેચ રમવાનો અનુભવ છે. આ કારણે તેઓ બાકીના કાર્યકાળ દરમિયાન ચીફ સિલેક્ટર તરીકે ચાલુ રહી શકે છે. જોકે, તેમની નિમણૂકને લઈને અંતિમ નિર્ણય BCCIએ જ લેવાનો છે. હાલમાં ઓઝાને આ જવાબદારી સોંપવાની શક્યતા છે.
રમેશ પવાર અને સમીર દિઘેના નામ પણ ચર્ચામાં
વેસ્ટ ઝોનમાંથી ખાલી પડેલી જગ્યા માટે પૂર્વ ભારતીય સ્પિનર રમેશ પવારનું નામ પણ ચર્ચામાં છે. પવારને અગાઉ જુનિયર પુરુષ પસંદગી સમિતિના અધ્યક્ષ પદ માટે સંભવિત ઉમેદવાર માનવામાં આવતા હતા. હવે તેઓ સિનિયર પસંદગી સમિતિમાં સ્થાન મેળવવા માટે દાવેદાર બની શકે છે. પૂર્વ ભારતીય વિકેટકીપર સમીર દિઘેનું નામ પણ સામે આવ્યું છે. અગાઉ BCCIએ પસંદગી સમિતિની જગ્યાઓ માટે અરજીઓ મંગાવી હતી ત્યારે પવાર અને દિઘે બંનેએ અરજી કરી હતી.
હવે BCCIના નિર્ણય પર નજર
પાર્થિવ પટેલે અરજી ન કરતાં ચીફ સિલેક્ટરની પસંદગી અંગેની ચર્ચા વધુ રસપ્રદ બની છે. જો BCCI સમયમર્યાદા નહીં વધારે, તો પાર્થિવની આ પદ માટેની દાવેદારી હાલ પૂરતી અટકી શકે છે. બીજી તરફ, પ્રજ્ઞાન ઓઝા અધ્યક્ષ તરીકે ચાલુ રહે અથવા વેસ્ટ ઝોનમાંથી કોઈ નવા સિલેક્ટરની પસંદગી થાય, તે અંગે હવે બોર્ડના નિર્ણયની રાહ જોવાઈ રહી છે. ભારતીય ટીમની આગામી પસંદગીઓ અને પસંદગી સમિતિની રચનાને ધ્યાનમાં રાખીને BCCIનો આ નિર્ણય મહત્વનો રહેશે.
આ પણ વાંચો: IND vs WI: એક પછી એક એવોર્ડ જીતી રહ્યો છે શાઈ હોપ, છતાં આ એક વાતની સતાવી રહી છે ચિંતા!