અમરેલી જિલ્લાના રાજુલા અને જાફરાબાદ પંથકમાં ફોરલેન વિસ્તરણ પ્રોજેક્ટને લઈને સ્થાનિક ખેડૂતોમાં ભારે આક્રોશ જોવા મળી રહ્યો છે. પ્રોજેક્ટ અંતર્ગત જમીન સંપાદનની પ્રક્રિયા અને વિવિધ માંગણીઓ યોગ્ય રીતે ન સંતોષાતા ખેડૂતો હવે આરપારના મૂડમાં આવી ગયા છે. આ મુદ્દે ખેડૂતોએ એકત્ર થઈને પ્રાંત અધિકારીને આવેદનપત્ર પાઠવી પોતાની ઉગ્ર રજૂઆતો કરી હતી.

લોઠપૂર અને લુણસાપુર સહિતના ગામોના ખેડૂતો આક્રમક મૂડમાં

આ આવેદનપત્ર પાઠવવામાં લોઠપૂર, લુણસાપુર, મીતીયાળા તેમજ જાફરાબાદ પંથકના ખેડૂતો મોટી સંખ્યામાં જોડાયા હતા. જમીન સંપાદન બાબતે ખેડૂતોના હિત સચવાય તે માટે સરકારી સ્તરે યોગ્ય નિર્ણય લેવામાં આવે તેવી માંગણી કરવામાં આવી છે. ખેડૂતોનું કહેવું છે કે, જો તેમની માંગણીઓ પ્રત્યે દુર્લક્ષ સેવવામાં આવશે, તો તેમને ભારે નુકસાન વેઠવાનો વારો આવશે.

સરકારને આપ્યું 3 દિવસનું આખરી અલ્ટીમેટમ

ખેડૂતોએ પ્રાંત અધિકારી મારફતે સરકારને સ્પષ્ટ શબ્દોમાં 3 દિવસનું અલ્ટીમેટમ આપ્યું છે. આવેદનપત્રમાં જણાવાયું છે કે, જો આગામી 3 દિવસની અંદર ફોરલેન પ્રોજેક્ટ અને જમીન સંપાદનના પ્રશ્નો અંગે હકારાત્મક અને સંતોષકારક નિર્ણય લેવામાં નહીં આવે, તો ખેડૂતો આગળની રણનીતિ નક્કી કરશે.

માંગણીઓ નહીં સંતોષાય તો હાઇવે અટકાવી ગાંધીચિંધ્યા માર્ગે આંદોલનની ચીમકી

ખેડૂતોએ એ પણ સ્પષ્ટ ચેતવણી આપી છે કે, જો સમયમર્યાદામાં તેમની વિવિધ માંગણીઓ પૂરી કરવામાં નહીં આવે, તો તેઓ ફોરલેન પ્રોજેક્ટનું કામ અટકાવી દેશે અને હાઇવે પર ઉતરીને ગાંધીચિંધ્યા માર્ગે આક્રમક આંદોલન શરૂ કરશે. આ ચીમકીને પગલે સ્થાનિક તંત્રમાં પણ દોડધામ મચી ગઈ છે.

આ પણ વાંચો: Amreliના ધારીની હેમરાજીયા નદીમાં પગ લપસતાં 13 વર્ષીય માસૂમ બાળકીનું ડૂબી જતાં કરુણ મોત