ભારતના પૂર્વ સ્પિનર આર. અશ્વિને વેસ્ટ ઈન્ડિઝ સામેની T20 શ્રેણીમાં કુલદીપ યાદવને પ્લેઇંગ ઇલેવનમાંથી બહાર રાખવાના ટીમ મેનેજમેન્ટના નિર્ણયની ટીકા કરી છે. અશ્વિનના મતે, વેસ્ટ ઈન્ડિઝના બેટર્સ કુલદીપની ગુગલી અને લેગ સ્પિનને સમજવામાં મુશ્કેલી અનુભવી રહ્યા હતા. આવી સ્થિતિમાં તેને ટીમની બહાર રાખવાનો નિર્ણય આશ્ચર્યજનક હતો. અશ્વિને પોતાની યુટ્યુબ ચેનલ પર કહ્યું કે જ્યાં પિચ પર ઉછાળ મળવાની અપેક્ષા હોય ત્યાં કુલદીપ ઉપયોગી સાબિત થઈ શક્યો હોત. તેણે કહ્યું કે કુલદીપને બહાર રાખવામાં થોડા સામાન્ય સમજના અભાવ જેવું લાગે છે. અશ્વિનને લાગે છે કે કુલદીપ ટીમમાં હોત તો મેચમાં 15થી 20 રનનો ફરક પડી શક્યો હોત.

પ્રથમ મેચમાં 2 વિકેટ, બીજીમાં ખર્ચાળ બોલિંગ

કુલદીપ યાદવ વેસ્ટ ઈન્ડિઝ સામેની શ્રેણીની પ્રથમ 2 મેચમાં રમ્યો હતો. લખનઉમાં રમાયેલી પ્રથમ મેચમાં તેણે 33 રન આપીને 2 વિકેટ લીધી હતી. જોકે, રાંચીમાં રમાયેલી બીજી મેચમાં તેણે 53 રન આપ્યા હતા. આ મેચમાં ભારતને હારનો સામનો કરવો પડ્યો હતો. ત્યારબાદ કુલદીપને ઇન્દોર અને હૈદરાબાદમાં રમાયેલી આગામી 2 મેચમાં તક મળી નહોતી. અશ્વિને કહ્યું કે ઇન્દોરમાં મેદાન નાનું હોવાથી કુલદીપને બહાર રાખવાનો નિર્ણય તે સમજી શકે છે, પરંતુ હૈદરાબાદમાં પણ તેને તક ન આપવી આશ્ચર્યજનક હતી.

હૈદરાબાદમાં ભારતીય બોલરોની મુશ્કેલી વધી

હૈદરાબાદમાં રમાયેલી ચોથી T20 મેચમાં વેસ્ટ ઈન્ડિઝે પ્રથમ બેટિંગ કરતાં 20 ઓવરમાં 3 વિકેટે 247 રન બનાવ્યા હતા. શાઈ હોપે 50 બોલમાં અણનમ 102 રન ફટકાર્યા હતા, જ્યારે શેરફેન રધરફોર્ડે 26 બોલમાં અણનમ 49 રન બનાવ્યા હતા. જવાબમાં ભારતીય ટીમ 223 રનમાં ઓલઆઉટ થઈ ગઈ હતી અને વેસ્ટ ઈન્ડિઝે 24 રનથી મેચ જીતી લીધી હતી. આ હાર સાથે પાંચ મેચની શ્રેણી 2-2થી બરાબર થઈ ગઈ હતી. ભારતીય બોલરો વેસ્ટ ઈન્ડિઝના આક્રમક બેટિંગ સામે રન રોકવામાં નિષ્ફળ રહ્યા હતા. અશ્વિનના મતે, આવી સ્થિતિમાં કુલદીપ જેવા વિકેટ લઈ શકે તેવા સ્પિનરની હાજરી ઉપયોગી બની શકી હોત.

રાંચીની હાર માટે કુલદીપને જવાબદાર ગણાવવો ખોટું

અશ્વિને એ વાતનો પણ વિરોધ કર્યો કે રાંચીમાં ભારતની હાર માટે કુલદીપને જવાબદાર ગણવામાં આવે. તેણે કહ્યું કે કુલદીપને બહાર રાખવાનો નિર્ણય પોતે જ આશ્ચર્યજનક હતો અને રાંચીની હારનું કારણ કુલદીપ હતો એવું માનવું યોગ્ય નથી. ઉલ્લેખનીય છે કે વેસ્ટ ઈન્ડિઝ સામેની વનડે શ્રેણીમાં કુલદીપ ભારતનો સૌથી સફળ બોલર રહ્યો હતો. તેણે 3 મેચમાં 7 વિકેટ ઝડપી હતી. તેથી T20 શ્રેણીની બાકીની મેચમાં તેને તક મળશે કે નહીં તે જોવાનું રહેશે.

હવે બેંગલુરુમાં શ્રેણીની નિર્ણાયક મેચ

ભારત અને વેસ્ટ ઈન્ડિઝ વચ્ચે પાંચમી અને અંતિમ T20 મેચ બેંગલુરુમાં રમાવાની છે. શ્રેણી 2-2થી બરાબર હોવાથી આ મેચ નિર્ણાયક બનશે. ભારતીય ટીમ માટે બોલિંગમાં સુધારો કરવો મહત્વનો રહેશે. હવે ટીમ મેનેજમેન્ટ કુલદીપ યાદવને ફરી પ્લેઇંગ ઇલેવનમાં સામેલ કરે છે કે નહીં, તેના પર પણ ચાહકોની નજર રહેશે.

આ પણ વાંચો: YBJ Fits: યશસ્વી જયસ્વાલે ક્રિકેટની બહાર પણ ફટકારી સિક્સર! લોન્ચ કરી પોતાની બ્રાન્ડ