રાજકોટમાં ભારતીય નાગરિકતા પ્રમાણપત્ર એનાયત સમારોહનું આયોજન કરવામાં આવ્યું હતું. આ કાર્યક્રમ દરમિયાન નાયબ મુખ્યમંત્રી હર્ષ સંઘવીએ Citizenship Amendment Act (CAA) અંગે મહત્વપૂર્ણ નિવેદન આપ્યું હતું. તેમણે CAA કાયદાનો વિરોધ કરનારાઓ અને આંદોલનકારીઓને આડે હાથ લેતા જણાવ્યું હતું કે, કેટલાક લોકોએ રાજકીય સ્વાર્થ ખાતર દેશના લોકોને ગેરમાર્ગે દોરીને CAA સામે વિરોધ પ્રદર્શનો અને આંદોલનો કર્યા હતા. જોકે, આજે આ કાયદાના કારણે જ પાકિસ્તાનમાં અત્યાચાર સહન કરી રહેલા લઘુમતી હિન્દુઓને ભારતમાં સન્માનજનક જીવન મળ્યું છે.
“માં હિંગળાજે આશીર્વાદ આપ્યા અને માં અંબાએ ભારતમાં શરણ આપ્યું”
પાકિસ્તાનથી ભારત આવેલા હિન્દુ શરણાર્થીઓને આવકારતા હર્ષ સંઘવીએ ભક્તિભાવપૂર્વક જણાવ્યું હતું કે, તમારા પર માં હિંગળાજના આશીર્વાદ હતા, તેથી જ તેમણે તમને ત્યાંથી સુરક્ષિત મોકલીને માં અંબાના ચરણોમાં પહોંચાડ્યા છે. તેમણે પાકિસ્તાનના થરપારકર વિસ્તારની સ્થિતિનો ઉલ્લેખ કરતા કહ્યું હતું કે, ત્યાં હિન્દુ મહિલાઓ માટે ઘરની બહાર નીકળવું પણ મુશ્કેલ હતું અને તેઓ ભારે અસુરક્ષા વચ્ચે જીવન જીવી રહી હતી.
‘પાકિસ્તાનના પાસપોર્ટ કરતાં રાજકોટના ગરબાની વેલ્યુ વધારે છે’
પોતાના સંબોધનમાં નાયબ મુખ્યમંત્રીએ અત્યંત રોચક અને પ્રભાવશાળી વાત કરતા કહ્યું હતું કે, આજે પાકિસ્તાનના પાસપોર્ટ કરતાં આપણા રાજકોટના ગરબાની વેલ્યુ ઘણી વધારે છે. પાકિસ્તાનની નાગરિકતા અને પાસપોર્ટ ધરાવતા લોકો અસુરક્ષિત અનુભવતા હતા, જ્યારે આજે ભારતીય નાગરિક બન્યા પછી તેઓ ખુલ્લી હવામાં નવરાત્રિના તહેવારનો આનંદ માણી રહ્યા છે.
‘મુસ્કુરાઈએ આપ ભારત કે નાગરિક હૈ’
નવરાત્રિના પવિત્ર દિવસોમાં ભારતીય નાગરિકત્વ મેળવનાર પરિવારોનો ઉત્સાહ વધારતા હર્ષ સંઘવીએ જાણીતી પંક્તિ દોહરાવી હતી કે, “મુસ્કુરાઈએ આપ સબ ભારત કે નાગરિક હૈ”. તેમણે ઉમેર્યું હતું કે, આ નવરાત્રિમાં આ તમામ પરિવારોના ઘરોમાં નવરાત્રિ નહીં પણ દિવાળી જેવો માહોલ અને ખુશીઓ છવાઈ ગઈ છે.
ભારતીય નાગરિકતા મળતા જ શરણાર્થીઓમાં હર્ષોલ્લાસ
કેન્દ્ર સરકાર દ્વારા CAA કાયદા હેઠળ પાકિસ્તાનથી આવેલા પીડિત પરિવારજનોને ભારતીય નાગરિકતા આપવાની પ્રક્રિયા સતત ચાલી રહી છે. રાજકોટ અને ગુજરાતના વિવિધ શહેરોમાં વસતા પાકિસ્તાની શરણાર્થીઓને નાગરિકતા પત્રો મળતા જ તેમના ચહેરા પર ખુશી જોવા મળી રહી છે. હર્ષ સંઘવીના આ નિવેદન બાદ સમગ્ર રાજ્યમાં CAA ના નિર્ણયના સકારાત્મક પરિણામોની ચર્ચા જાગી છે.
આ પણ વાંચો: Rajkot લૂંટ-હત્યા કેસ મામલે DYCMએ પોલીસનો આભાર માન્યો, હર્ષ સંઘવીએ આપ્યું મોટું નિવેદન