અમદાવાદ મહાનગરપાલિકા દ્વારા શહેરના પ્રખ્યાત પર્યટન સ્થળ કાંકરિયા લેક ખાતે આવતા મુલાકાતીઓ અને પ્રકૃતિપ્રેમીઓ માટે એક વિશેષ સુવિધા શરૂ કરવાનું આયોજન કરવામાં આવ્યું છે. અમદાવાદ મનપા દ્વારા કાંકરિયા પરિસરમાં પક્ષી દર્શન માટે ખાસ 10 ઉત્તમોત્તમ બાઈનોક્યુલર (દૂરબીન) વસાવવાનો મહત્વપૂર્ણ નિર્ણય લેવામાં આવ્યો છે. આ નવી સુવિધાથી કાંકરિયાની મુલાકાતે આવતા સૈલાણીઓ માટે એક નવું આકર્ષણ ઉમેરાશે.
શિયાળાની ઋતુમાં દેશ-વિદેશના પક્ષીઓ નિહાળવાની અનોખી તક
દર વર્ષે શિયાળાની સીઝન શરૂ થતાં જ કાંકરિયા તળાવ અને આસપાસના વૃક્ષો પર અસંખ્ય દેશી તેમજ પ્રવાસી (યાયાવર) પક્ષીઓનો જમાવડો જોવા મળે છે. શિયાળાના આહલાદક વાતાવરણમાં તળાવ કિનારે આવતા રંગબેરંગી પક્ષીઓને નજીકથી નિહાળવા અને તેમના વિશે જાણકારી મેળવવા માટે પક્ષીપ્રેમીઓ માટે આ એક સુવર્ણ તક બની રહેશે.
સવારે 6 થી 8 વાગ્યા દરમિયાન યોજાશે ‘બર્ડ વોચિંગ’ સેશન
અમદાવાદ મનપા દ્વારા કરવામાં આવેલા આયોજન મુજબ, પક્ષી દર્શનની આ સુવિધા સવારના સમયે ઉપલબ્ધ કરાવવામાં આવશે. મુલાકાતીઓ દરરોજ સવારે 6 થી 8 વાગ્યા દરમિયાન તળાવ કિનારે આવીને બાઈનોક્યુલરની મદદથી પક્ષીઓની વિવિધ પ્રજાતિઓ નિહાળી શકશે. સવારના શાંત અને ખુશહાલ વાતાવરણમાં પક્ષીઓની કલરવ સાંભળવાનો અને તેમને નજીકથી જોવાનો અનોખો આનંદ મળશે.
પ્રાણી સંગ્રહાલયનો નિષ્ણાત સ્ટાફ કરશે બાઈનોક્યુલર ઓપરેટ
AMCના સ્ટેન્ડિંગ કમિટી ચેરમેન કમલેશ પટેલે જણાવ્યું હતું કે, આ સુવિધાનો લાભ મુલાકાતીઓ સરળતાથી લઈ શકે તે માટે કાંકરિયા પ્રાણી સંગ્રહાલયનો તાલીમબદ્ધ સ્ટાફ જ બાઈનોક્યુલર ઓપરેટ કરશે. સ્ટાફના સભ્યો મુલાકાતીઓને બાઈનોક્યુલર સેટ કરવામાં મદદ કરશે એટલું જ નહીં, પરંતુ જોવા મળતાં પક્ષીઓ વિશે રસપ્રદ વિગતો અને માહિતી પણ પુરી પાડશે. મનપાના આ સરાહનીય આયોજનથી પર્યાવરણ અને પક્ષીઓ પ્રત્યે લોકોમાં જાગૃતિ વધશે.
આ પણ વાંચો: Ahmedabad મનપાનો અંધેર નગરી જેવો વહીવટ: પ્લોટનું ભાડું ભર્યા વગર જ યોજાયા ગરબા!