ભારત અને વેસ્ટ ઇન્ડિઝ વચ્ચે પાંચ મેચોની T20 સીરિઝનો અંતિમ અને નિર્ણાયક મુકાબલો બેંગલુરુના એમ. ચિન્નાસ્વામી સ્ટેડિયમ ખાતે રમાવા જઈ રહ્યો છે. સિરીઝ જીતવાના સંઘર્ષ વચ્ચે આ મેચ ભારતીય વિકેટકીપર-બેટર ઈશાન કિશન માટે કારકિર્દીનો સૌથી મોટો સિધ્ધી હાંસલ કરવાની તક છે. આ મેચમાં ઈશાન પાસે એક નહીં પરંતુ બે મોટા કીર્તિમાન પોતાના નામે કરવાનો મોકો છે.
T20Iમાં 2,000 રનનો જાદુઈ આંકડો
ઈશાન કિશન આંતરરાષ્ટ્રીય T20 ક્રિકેટમાં 2,000 રન પૂરા કરવાથી માત્ર 76 રન છેટે છે. અત્યાર સુધીમાં તેણે 65 ઇનિંગ્સમાં 1,924 રન બનાવ્યા છે. જો વેસ્ટ ઇન્ડિઝ સામે તે આ 76 રન બનાવી લેશે, તો તે ભારત તરફથી T20 આંતરરાષ્ટ્રીય ક્રિકેટમાં 2,000 રન બનાવનારા દિગ્ગજ ખેલાડીઓની યાદીમાં સામેલ થઈ જશે.ભારત માટે અત્યાર સુધી રોહિત શર્મા, વિરાટ કોહલી, સૂર્યકુમાર યાદવ, હાર્દિક પંડ્યા, કેએલ રાહુલ અને તાજેતરમાં અભિષેક શર્મા આ સિદ્ધિ મેળવી ચૂક્યા છે. હવે ઈશાન કિશન આ એલિટ ક્લબમાં એન્ટ્રી કરવા માટે પૂરી રીતે તૈયાર છે.
ભારતીય વિકેટકીપર્સમાં કેએલ રાહુલ પછી બીજું સ્થાન
ભારતીય વિકેટકીપર બેટર્સના T20 આંતરરાષ્ટ્રીય પ્રદર્શન પર નજર કરીએ તો કેએલ રાહુલ 68 ઇનિંગ્સમાં 2,265 રન સાથે ટોચના સ્થાને છે. ઈશાન કિશન 1,924 રન સાથે બીજા ક્રમે મજબૂત સ્થિતિમાં છે, જ્યારે સંજુ સેમસન 68 ઇનિંગ્સમાં 1,719 રન સાથે ત્રીજા સ્થાને છે. આગામી મેચોમાં શાનદાર પ્રદર્શન જાળવી રાખીને ઈશાન પાસે કેએલ રાહુલના આંકડાને પણ પડકારવાની તક રહેશે.
સૂર્યકુમાર યાદવનો કેલેન્ડર યર રેકોર્ડ નિશાના પર
ઈશાન કિશન માત્ર 2,000 રનના આંકડા સુધી પહોંચવા પૂરતો મર્યાદિત નથી, પરંતુ તેની નજર એક કેલેન્ડર વર્ષમાં સૌથી વધુ T20 રન બનાવવાના ભારતીય રેકોર્ડ પર પણ છે. વર્ષ 2022માં સૂર્યકુમાર યાદવે 1,164 રન બનાવીને ભારત માટે એક કેલેન્ડર વર્ષમાં સૌથી વધુ T20 રનનો રેકોર્ડ બનાવ્યો હતો.ઈશાન કિશન વર્ષ 2026માં અત્યાર સુધી 1,128 રન નોંધાવી ચૂક્યો છે. સૂર્યાનો ઓલ-ટાઈમ રેકોર્ડ તોડવા માટે ઈશાનને માત્ર 37 રનની જરૂર છે. આ વર્ષે 1 સદી અને 7 અડધી સદી ફટકારનાર ઈશાન હાલ શાનદાર ફોર્મમાં છે.
ઓપનર અભિષેક શર્મા પાસે પણ મોટી તક
બીજી તરફ, ભારતીય ઓપનર અભિષેક શર્મા પણ વર્ષ 2026માં એક કેલેન્ડર વર્ષમાં 1,000 આંતરરાષ્ટ્રીય T20 રન પૂરા કરવાની નજીક છે. અત્યાર સુધી 950 રન બનાવી ચૂકેલા અભિષેકને આ સિદ્ધિ માટે માત્ર 50 રનની જરૂર છે. બેંગલુરુની નાની બાઉન્ડ્રી અને બેટિંગ-ફ્રેન્ડલી પિચ પર ઈશાન કિશન અને અભિષેક શર્મા બંને પાસેથી વિસ્ફોટક ઇનિંગ્સની અપેક્ષા રાખવામાં આવી રહી છે.
આ પણ વાંચો – Yuzvendra Chahal સાથે થઈ હતી ભયાનક ક્રૂરતા! ત્રણ વર્ષ પહેલા…