ભારત અને વેસ્ટ ઇન્ડિઝ વચ્ચે રમાનારી 5 મેચની T20 સીરિઝની નિર્ણાયક મેચ પહેલાં ક્રિકેટ ચાહકો માટે ચિંતાજનક સમાચાર સામે આવ્યા છે.આજે બેંગલુરુના એમ.ચિન્નાસ્વામી સ્ટેડિયમમાં રમાનારી આ મેચમાં વરસાદ વિઘ્ન બની શકે છે.બંને ટીમો વચ્ચે સીરિઝ હાલમાં 2-2થી બરાબર છે, તેથી આ મુકાબલો જીતનારી ટીમ સીરિઝ પોતાના નામે કરશે.જોકે,હવામાનની આગાહીએ બંને ટીમોની ચિંતા વધારી દીધી છે.

બેંગલુરુમાં વરસાદની શક્યતા કેટલી?

ભારતીય હવામાન વિભાગના જણાવ્યા અનુસાર આજે બેંગલુરુમાં આકાશ વાદળછાયું રહેવાની શક્યતા છે.શહેરમાં વરસાદ અથવા ગાજવીજ સાથે ઝાપટાં પડી શકે છે.આ ઉપરાંત વીજળી સાથે વાવાઝોડાની ચેતવણી પણ આપવામાં આવી છે.હવામાન વિભાગના અનુમાન પ્રમાણે,લઘુત્તમ તાપમાન 20 ડિગ્રી અને મહત્તમ તાપમાન 29 ડિગ્રી સેલ્સિયસની આસપાસ રહી શકે છે.બીજી તરફ, BBCના કલાકવાર હવામાન અનુમાનમાં પણ વરસાદની ઊંચી શક્યતા દર્શાવવામાં આવી છે.અનુમાન મુજબ સાંજે 5 વાગ્યે વરસાદની શક્યતા 66 ટકા,6 વાગ્યે 68 ટકા અને 7 વાગ્યે 69 ટકા છે. રાત્રે 8 અને 9 વાગ્યે આ શક્યતા 70 ટકા સુધી પહોંચી શકે છે. રાત્રે 10 વાગ્યે પણ વરસાદની શક્યતા 69 ટકા દર્શાવવામાં આવી છે.આ આગાહીને જોતાં મેચ શરૂ થવાના સમયે અને ત્યાર બાદ પણ વરસાદ વિઘ્ન બની શકે છે.

શું વરસાદને કારણે આખી મેચ રદ થશે?

હાલની આગાહીના આધારે આખી મેચ ધોવાઈ જશે એવું નિશ્ચિતપણે કહી શકાય નહીં. જો વરસાદ થોડા સમય માટે પડે અને ત્યારબાદ મેદાન રમવા યોગ્ય બને, તો મેચ મોડી શરૂ થઈ શકે છે. જોકે, લાંબા સમય સુધી વરસાદ ચાલુ રહે તો ઓવરમાં ઘટાડો કરવાની સ્થિતિ પણ ઊભી થઈ શકે છે.એમ. ચિન્નાસ્વામી સ્ટેડિયમની પાણીનો નિકાલ કરવાની વ્યવસ્થા મેદાનને ઝડપથી રમવા યોગ્ય બનાવવામાં મદદરૂપ થઈ શકે છે. તેમ છતાં, સતત વરસાદ અને ગાજવીજને કારણે મેચ સમયસર શરૂ કરવી મુશ્કેલ બની શકે છે.

બેટ્સમેનોને મદદરૂપ રહેશે પિચ, ઝાકળની પણ અસર

બેંગલુરુના એમ.ચિન્નાસ્વામી સ્ટેડિયમની પિચ સામાન્ય રીતે બેટ્સમેનો માટે અનુકૂળ માનવામાં આવે છે. અહીં ઘણી વખત મોટા સ્કોર જોવા મળે છે.જોકે,આ વખતે વરસાદને કારણે પિચની સ્થિતિ અને મેદાનની ભીનાશ મેચના પરિણામ પર અસર કરી શકે છે.જો મેચ મોડી સાંજ સુધી ચાલશે,તો ઝાકળ પણ મહત્વની ભૂમિકા ભજવી શકે છે.ભીના બોલને કારણે બોલરોને પકડ બનાવવામાં મુશ્કેલી પડી શકે છે. આવી સ્થિતિમાં બીજી ઇનિંગમાં બેટિંગ કરતી ટીમને ફાયદો થઈ શકે છે.તેથી ટોસ જીત્યા બાદ બેટિંગ કે બોલિંગ પસંદ કરવાનો નિર્ણય બંને ટીમો માટે મહત્વનો રહેશે.

વેસ્ટ ઇન્ડિઝ પાસે 24 વર્ષ બાદ ઇતિહાસ રચવાની તક

ભારત અને વેસ્ટ ઇન્ડિઝ વચ્ચેની આ મેચ માત્ર શ્રેણી જીતવા પૂરતી મર્યાદિત નથી. વેસ્ટ ઇન્ડિઝ પાસે વર્ષ 2002 પછી ભારતીય ધરતી પર કોઈપણ ફોર્મેટની દ્વિપક્ષીય શ્રેણી જીતવાની તક છે. શ્રેણી 2-2થી બરાબર હોવાથી બંને ટીમો માટે આ અંતિમ મુકાબલો નિર્ણાયક રહેશે.જોકે, વરસાદને કારણે મેચનું પરિણામ ન આવે તો શ્રેણીનો નિર્ણય લાગુ પડતા નિયમો પ્રમાણે થઈ શકે છે. આવી સ્થિતિમાં વરસાદ બંને ટીમોની યોજનાઓ પર પાણી ફેરવી શકે છે.

બેંગલુરુમાં ભારતનો T20 આંતરરાષ્ટ્રીય રેકોર્ડ

ભારતીય ટીમે બેંગલુરુમાં અત્યાર સુધી કુલ 8 T20 આંતરરાષ્ટ્રીય મેચ રમી છે.આમાંથી 4 મેચમાં જીત મેળવી છે, 3 મેચમાં હારનો સામનો કર્યો છે, જ્યારે 1 મેચનું પરિણામ આવ્યું નથી.ભારતે અહીં છેલ્લે અફઘાનિસ્તાન સામે યાદગાર મેચ રમી હતી,જેમાં બે સુપર ઓવર રમાઈ હતી. હવે લગભગ 2 વર્ષ બાદ ભારતીય ટીમ આ મેદાન પર વેસ્ટ ઇન્ડિઝ સામે રમવા ઉતરશે.ભારત અને વેસ્ટ ઇન્ડિઝ બંને માટે આ મેચ અત્યંત મહત્વની છે.એક તરફ શ્રેણી જીતવાની તક છે, તો બીજી તરફ વરસાદનું જોખમ પણ છે. હવે ક્રિકેટ ચાહકોની નજર માત્ર ખેલાડીઓના પ્રદર્શન પર જ નહીં,પરંતુ બેંગલુરુના હવામાન પર પણ રહેશે.

આ પણ વાંચો – Breaking News : વર્લ્ડ કપમાં રોહિત શર્માને આઉટ કરનાર ખેલાડીએ 30 વર્ષની ઉંમરે અચાનક લીધી નિવૃત્તિ