ભારતમાં નવરાત્રી પર્વ દરમિયાન ચારેય તરફ ગરબા, દાંડિયા અને માતાજીની ભક્તિનો માહોલ જોવા મળતો હોય છે. પરંતુ પડોશી દેશ પાકિસ્તાનમાં વસતો હિન્દુ સમુદાય આ તહેવાર કેવી રીતે ઉજવે છે? તાજેતરમાં સોશિયલ મીડિયા પર પાકિસ્તાનના કરાંચી શહેરથી નવરાત્રી સેલિબ્રેશનના ઘણા વીડિયો વાયરલ થઈ રહ્યા છે, જેમાં પૂજા-અર્ચના, ગરબા અને ભંડારાની મનમોહક ઝલક જોવા મળી રહી છે. કરાંચીના ઐતિહાસિક મંદિરે પહોંચી કન્ટેન્ટ ક્રિએટર વાયરલ વીડિયોમાં જાણીતી સિંધી કન્ટેન્ટ ક્રિએટર ‘મુન્જી ગલ્હિયુન’ (@munji_galhiyun) કરાંચી ખાતે આવેલા પ્રખ્યાત શ્રી રત્નેશ્વર મહાદેવ મંદિરમાં પહોંચતી નજરે પડે છે. વીડિયોમાં તે ખુલ્લા પગે મંદિરમાં પ્રવેશ કરે છે, માતાજીના દર્શન તથા વિધિવત પૂજા-અર્ચના કરે છે અને ત્યાં ઉપસ્થિત શ્રદ્ધાળુઓ સાથે ગરબે ઘૂમતી જોવા મળે છે. ભક્તો ‘જય માતા દી’ના જયઘોષ સાથે ભક્તિભાવમાં લીન દેખાય છે. ગરબાની રમઝટ અને પારંપરિક ભંડારો મંદિર પરિસરમાં મોટી સંખ્યામાં ભાવિકો ઉપસ્થિત રહી ભજન-કીર્તન અને ગરબાનો આનંદ માણતા નજરે પડે છે. પૂજા અને રાસ-ગરબા બાદ ભંડારાની પણ વ્યવસ્થા કરવામાં આવી હતી, જેમાં દાળ-ભાત અને પાપડ જેવા પરંપરાગત ભોજનનો પ્રસાદ ભક્તોને પ્રેમપૂર્વક પીરસવામાં આવ્યો હતો. માતાજીની પ્રતિમા સામે શ્રદ્ધાળુઓની ભીડ અને ભક્તિમય વાતાવરણ સમગ્ર વીડિયોમાં સ્પષ્ટ જોઈ શકાય છે. સોશિયલ મીડિયા પર લોકોની સકારાત્મક પ્રતિક્રિયા આ વીડિયો સામે આવ્યા બાદ ભારત સહિત વિશ્વભરના નેટિઝન્સ તેના પર પ્રતિક્રિયા આપી રહ્યા છે. અનેક યુઝર્સે પાકિસ્તાનમાં રહેતા હિન્દુ સમુદાયને નવરાત્રીની હાર્દિક શુભકામનાઓ પાઠવી છે, તો કેટલાકે સરહદોથી પર બંને દેશો વચ્ચેની સમાન સાંસ્કૃતિક વિરાસત અને પરંપરાઓની પ્રશંસા કરી છે. પાકિસ્તાનમાં હિન્દુ વસ્તી અને સાંસ્કૃતિક ધરોહર ઉલ્લેખનીય છે કે પાકિસ્તાનમાં હિન્દુ સમુદાય મુખ્યત્વે સિંધ પ્રાંતમાં વસવાટ કરે છે. કરાંચી પણ સિંધનો જ એક ભાગ છે અને ત્યાં ઘણા ઐતિહાસિક હિન્દુ તીર્થસ્થળો આવેલા છે. તેથી નવરાત્રી, દિવાળી કે હોળી જેવા મુખ્ય તહેવારો દરમિયાન કરાંચીના મંદિરોમાં યોજાતા ધાર્મિક ઉત્સવો હંમેશાં વિશેષ આકર્ષણનું કેન્દ્ર બનતા હોય છે.