અમેરિકામાં મિડટર્મ ચૂંટણી પહેલાં રાજકીય પ્રચારમાં AIનો ઉપયોગ ઝડપથી વધ્યો છે. ઉમેદવારો અને રાજકીય સંગઠનોએ AIથી બનાવવામાં આવેલી જાહેરાતોના પ્રચાર પર આશરે 1,300 કરોડ રૂપિયા ખર્ચ્યા છે. એક જાહેરાતમાં ન્યૂયોર્કના મેયર ઝોહરાન મમદાની અને ગવર્નર કેથી હોકુલને મોંઘવારી અને ગુનાનો ભય દૂર કરતી દવા વેચતા બતાવવામાં આવ્યા છે. બીજી તરફ, ચૂંટણી પ્રચારમાં AIની મદદથી એવા દૃશ્યો પણ બનાવવામાં આવી રહ્યા છે, જેમાં વાસ્તવિક લોકોના બદલે નકલી ચહેરા અને ઘટનાઓ દેખાય છે. તેનો ઉપયોગ તસવીરોમાં ફેરફાર કરવાથી લઈને એવા વીડિયો બનાવવા સુધી થઈ રહ્યો છે, જેને જોઈને વાસ્તવિક અને નકલી વચ્ચેનો તફાવત કરવો મુશ્કેલ બની શકે છે. 80% AI જાહેરાતો ટ્રમ્પની પાર્ટી જ બનાવી રહી છે અમેરિકાની વેસ્લિયન યુનિવર્સિટીની તપાસમાં 220થી વધુ એવા વીડિયો ઓળખવામાં આવ્યા છે, જેમાં AIનો ઉપયોગ કરવામાં આવ્યો હતો. આમાંથી આશરે અડધી જાહેરાતોમાં વાસ્તવિક નેતાઓના AIથી બનાવેલા ચહેરા અથવા વીડિયો દર્શાવવામાં આવ્યા હતા. વેસ્લેયન મીડિયા પ્રોજેક્ટની પ્રોફેસર એરિકા ફ્રેન્કલિન ફાઉલરે કહ્યું, ઘણી જાહેરાતોમાં AIનો ઉપયોગ એટલી કુશળતાથી કરવામાં આવ્યો હતો કે કોઈ પણ જાણકારી વિના એ ઓળખવું મુશ્કેલ બની શકે છે કે વીડિયોમાં AIનો ઉપયોગ થયો છે. હેતુ- વિરોધીઓને બદનામ કરવાનો AIથી બનાવવામાં આવેલી કેટલીક જાહેરાતોમાં રાજકીય વિરોધીઓને એવા નેતાઓ સાથે દર્શાવવામાં આવ્યા હતા, જેમની સાથે જોડાણ મતદારોમાં વિવાદ ઊભો કરી શકે છે. તેમાં ડેમોક્રેટિક પાર્ટીનાં હિલેરી ક્લિન્ટન અને એલેક્ઝાન્ડ્રિયા ઓકાસિયો-કોર્ટેઝ જેવા નેતાઓનો સમાવેશ થાય છે. ઓક્લાહોમામાં ‘મેક ઓક્લાહોમા ગ્રેટ અગેઇન’ નામના એક જૂથે ડેમોક્રેટિક ગવર્નર પદના ઉમેદવારને હિલેરી ક્લિન્ટન સાથે ભેટતા દર્શાવ્યા. વીડિયોમાં બંને હાથ પકડીને ઊભેલા દેખાડવામાં આવ્યા, જ્યારે રાષ્ટ્રપતિ ડોનાલ્ડ ટ્રમ્પ બાજુમાં ઉદાસ ઊભેલા નજરે પડ્યા. સ્ક્રીન પર લખ્યું હતું, ‘ક્લિન્ટનના સમર્થક, ટ્રમ્પના વિરોધી.’ જાહેરાતો પર નજર રાખતી કંપની AdImpact અનુસાર, જૂથે ઓક્લાહોમામાં ટીવી કાર્યક્રમો દરમિયાન આ જાહેરાતનો પ્રચાર કરવા માટે 2 લાખ ડોલર એટલે કે આશરે 1.7 કરોડ રૂપિયાથી વધુ ખર્ચ કર્યા. ડેમોક્રેટ નેતાને 9/11 હુમલા પર બનેલા કાર્ડ પર હસતા દર્શાવ્યા બીજી એક જાહેરાતમાં મિશિગનના ડેમોક્રેટિક સેનેટ ઉમેદવાર ડૉ. અબ્દુલ અલ-સૈયદનો AI દ્વારા બનાવાયેલો વીડિયો દર્શાવવામાં આવ્યો હતો. તેમાં તેઓ ‘અમેરિકાનું મૃત્યુ’ અને ‘9/11 હુમલાની ઉજવણી કરો’ લખેલા કાર્ડ જોઈને હસતા નજરે પડ્યા. તેમજ, ફ્લોરિડાના ગવર્નર પદના રિપબ્લિકન ઉમેદવાર જેમ્સ ફિશબેકની એક જાહેરાતમાં તેમને ડેમોક્રેટિક સાંસદ ઇલ્હાન ઉમર અને ઈરાનના નેતાઓ સાથે પાર્ટી કરતા દર્શાવવામાં આવ્યા હતા. વીડિયોમાં ઈરાની નેતાઓ તલવારો વડે યહૂદી ધર્મના પ્રતીક ‘સ્ટાર ઑફ ડેવિડ’ પર હુમલો કરતા દેખાડવામાં આવ્યા હતા. રાજકીય જાહેરાતોમાં AIનો ઉપયોગ માત્ર નકલી ઘટનાઓ ઊભી કરવા પૂરતો મર્યાદિત નથી. તેનો ઉપયોગ જૂના ફોટોગ્રાફ્સને વીડિયો જેવા દેખાડવા અને આવા દૃશ્યો તૈયાર કરવા માટે પણ થઈ રહ્યો છે. ઓક્લાહોમાના રિપબ્લિકન ઉમેદવાર ચિપ કીટનની એક જાહેરાતની શરૂઆતમાં તેમનો જૂનો ફોટોગ્રાફ દર્શાવવામાં આવ્યો હતો. આ ફોટોગ્રાફ તે સમયનો હતો, જ્યારે તેઓ ઓક્લાહોમામાં પોલીસ અધિકારી હતા. AIની મદદથી ફોટોગ્રાફમાં તેમનું માથું ઊંચું થતું અને ચહેરો હસતો બતાવવામાં આવ્યો હતો. AIની મદદથી 19 કરોડમાં બનતી જાહેરાતો 1 કરોડમાં બની રહી છે હોલિવૂડની જાહેરાત કંપની સ્ટ્રેટેજિક પરસેપ્શનના સ્થાપક ફ્રેડ એન. ડેવિસના જણાવ્યા મુજબ, AI જાહેરાત બનાવવાની કિંમત ઘણી ઓછી કરી રહ્યું છે. તેમણે એક જાહેરાતનું ઉદાહરણ આપતાં જણાવ્યું કે તેને પરંપરાગત રીતે બનાવવામાં આવે તો આશરે 19 કરોડ રૂપિયા ખર્ચ થાય. આ માટે સેંકડો કલાકારો, કપડાંની વ્યવસ્થા, ખાણી-પીણી અને કેમેરા-લાઇટિંગ સાથે આખા દિવસના શૂટિંગની જરૂર પડે. પરંતુ AIની મદદથી એ જ દૃશ્ય તૈયાર કરવામાં ખર્ચ ઘટીને આશરે 1.8 કરોડ રૂપિયા રહ્યો છે. હવે AI ઓછા સમય અને ઓછા ખર્ચમાં આવા જાહેરાતો બનાવી શકે છે. ઘણી વાર દર્શકોને ખબર પણ પડતી નથી કે વીડિયોમાં દેખાડવામાં આવેલી ઘટના અસલી નથી. ડેમોક્રેટિક ઉમેદવારો AIના ઉપયોગમાં વધુ સાવચેત ડેમોક્રેટિક ઉમેદવારો AIના ઉપયોગને લઈને રિપબ્લિકન ઉમેદવારો કરતાં વધુ સાવચેત છે. તેનું એક કારણ એ છે કે ડેમોક્રેટિક પાર્ટીના સમર્થકો આ ટેક્નોલોજીની વધુ ટીકા કરે છે અને તેના પર નિયમો બનાવવાની માંગ કરે છે. વોશિંગ્ટન સ્ટેટ યુનિવર્સિટીના પ્રોફેસર અને પ્રોજેક્ટના સહ-નિર્દેશક ટ્રેવિસ એન. રિડઆઉટે જણાવ્યું કે AIનો ઉપયોગ કરવાથી ડેમોક્રેટિક ઉમેદવારો અને સંગઠનોની છબીને નુકસાન પહોંચવાનું જોખમ વધુ છે, કારણ કે તેઓ પોતે જ આ ટેક્નોલોજી પર નિયંત્રણ માટે નિયમો બનાવવાની માંગ કરી રહ્યા છે. —————————–